Ka lympung yalehke ki skurbah kawa tip kam ka Khelo India University Games (KIUG) 2023 da sdang ko ynne ha sor Shillong heiwa u Montri ka chnat Sports, u Shakliar Warjri da wai u yaka ha SAI, NEHU Campus Shillong, hei emlang ka Deputy Commissioner, ka R.M Kurbah, u DGP u Dr. L.R Bishnoi, u Prof. D.K Nayak, Acting Vice Chancellor NEHU wa kiwi kiwi.
U Shakliar hawa e yei klam da ong u wa ka sorkar jylla kreh ko waka sorkar pyrdi wow pynku ya ki yalehke hapoh ka ri.
Da ong u wa ka Khelo India University Games 2023 toh wow pynku ya ki yalehke hapoh ka jylla wa ka ri, wei deiwa pynman ya ki lympung yalehke daw yoh ki khynnah khynroo khyllood ya ka mynried wa tyrchaaiñ.
Chooh chooh da ong u wa ki khynroo khyllood ka ri em ki chiboon ki sap wei kyrmen u wa ha kawi ka sngi daw ye ki wow mihkhmat yaka jylla waka ri.
U Shakliar da pyntip u wa em hadooh 33 tylli ki skurbah kiwa chimbynta ha kani ka Khelo India University Games 2023 kawa da pynman hapoh ka jylla.
Da kitbok u leh ya waroh kiwa chimbynta ha kani ka lympung.
Discussion about this post