Hadien wa da kut i e por ka Dorbar Chnong Tympang Iawmusiang le sngi wow kit noh yei jhep wa da lang hapoh ka chnong heiwa ynnin haiden wa dep kit, da noh biang yei jhep pyn ha ka luti wow lai cha Thomas Jones Synod College, kamtæ ynne ka sngi da chim ya ka rai wow pynman yei khang chnong wa 36 kynta.
Ini mut nadooh 6:00 waje i step ka 26 tarik hadooh 6:00 waje i janmiet ka 27 tarik.
Neiliang u Waheh Chnong, u Ajoy Lywait da ong u wa ini toh kam i dak wow pynyoo wa emkaam yei thaw noh jhep yow lait u pynman ya ka chnong ka thaw kam ka thaw noh jhep.
Da ong u leh kamwa man kattæ kat chawa thmu wow noh jhep da em bait kiwa pyrchah nadooh ka Elaka Sutnga, ki Khliehtyrchi kamtæ da ong u wa ileh ka Iawmusiang toh ka thaw noh jhep mo.
Da khana u leh wa ha kini ki 36 kynta u pynlait ya ki kari Ambulance, ki kari Fire Brigade, ki dukan Pharmacy, ki kari dai dud, ki kari dai LPG wa ki laad pathai khubor.
Da maham leh wa neini chakhmat ym chah de wow noh jhep ha Iawmusiang wei lada chem daw ekti biat cha ka aiñ.
Da e FIR leh heiyatoh wa wan noh biang yei jhep ha luti wa lai cha Thomas Jones Synod College.
Ha kani ka sngi ki dkhot ka Dorbar Chnong da lai kyrpaad ki ya kiwa chongdai wow kit yei jhep wa mih cha ki yung ki sem lane cha ki chong yong ki hi.
