Ka 3rd Division Football Tournament ka West Jaiñtia District Sports Association (WJDSA) wa tip leh kam ka 3rd U Adelbert Laloo Memorial Trophy da pteiñ ya ka ynne ka sngi da le tylli biang ki yalehke tangwa ar tylli da hap pyndam neidaw wa slap wei joor lyoh.
Ha ka yalehke wa nyngkong hapyrdi ka Samaro waka Nangbah Khloopano da kut ko da 3-3.
Ya ka Samaro da thap da u Dunsill Chyrmang haka minit wa 18, u Fourki Dkhar ha ka minit wa 52 wa u Deibor Bareh haka minit wa 60.
Ya ka Nangbah Khloopano da thap da u Armstrong Dhar haka minit wa 4, u Aiban Lamare haka minit wa 48 wa u Teiban Lamare haka minit wa 57.
Ka yalehke hapyrdi ka Mookaswan Dongwah waka Tympang Club, ka Kseh Sylle Ialong waka F.A.M da hap pyndam ynne ka sngi wei daw rah won cha kawi ka sngi.
Ynnin won da yoh wow pynman waroh le tylli ki yalehke heiwa ka Luti Tuber Ialong da jop ko ya ka Youth Social Welfare Pynthor da 1-0 lyngba ka kool wa thap da u Phrangki Dhar ha ka minit wa 41.
Ha ka yalehke wa ar, ka Mulang Ialong da jop ko ya ka Madan Thadmuthlong da 1-0 da ka kool wa thap u Dangaitlang Mulieh ha ka minit wa 70+1.
Ha ka yalehke wa le won hapyrdi ka Lumpyrtuh Mihmyntdu waka Royal Pole Mihmyntdu da kut da 1-1.
Ya ka Lumpyrtuh Mihmyntdu da thap da u Nikhil Dkhar ha ka minit wa 18 katwa ya ka Royal Pole Mihmyntdu da thap da u Hamewan Sayoo ha ka minit wa 70+2.
