Ynne ka sngi u Symbood Montri Rangbah ka jylla, u Sniawbhalang Dhar da wan u cha JHADC wow booddien yei man i long, i krehkaam wa i kaam poisa poilaiñ ka Council heiwa da chong u ya ka yalang ha Conference Hall ka Council.
Ha kani ka yalang booddien da emlang u CEM ka JHADC u Thombor Shiwat, ki MDC ka Council wa ki sahep yong ka.
Hadien ka yalang hawa yaklam wa kiwa pathai khubor, u Sniawbhalang da ong u wa kani man ko ka sien wa nyngkong wow wan u Montri cha kani ka Council heiwa em chiboon i daw wa wan wow yachem ya ki dkhot ka EC wow phyllu heiyatoh wa ki kaam wa chem chitom ka Council.
Heiyatoh wa ka bhah yong ka Counci wa toh u yoh ko na ka sorkar jylla iwa man i kaam wa da sahteiñ da boon snem, neiliang u Sniawbhalang da ong u wa da yaklam leh hajrong kani ka phang wei ka sorkar daw pyrchang ko smat wow pynlait ya kani ka bhah.
Da ong u leh wa da yaklam kammon wow pynku ya i yoh i l laa ka Council iwa ymtoh u ktah ya ki paidbah.
Heiyatoh wa ka tulop kiwa kreh ka Council kawa da sahteiñ da slem, neiliang u Sniawbhalang da ong u wa ka sorkar daw yaleh ko wow pynlait smat ya ka bhah ka Council.
