Ynne ka sngi ka India da yoh ko hadooh soo tylli ki takma ha ka lympung Tokyo Summer Paralympics iwa man iwa boon dooh ha ka chi sngi nadooh wa sdang kani ka lympung ha ka 25 Naisaphra wei ka wow kut mynstep ka 5 tarik.
Ynne ka sngi kiwa yoh ya ka takma man ki kamni hawah:
- U Manish Narwal uwa da yoh Takma Ksiar ha ka Mixed P4 50 metre pistol SH1.
- U Pramod Bhagat uwa da yoh Takma Ksiar ha ka Badminton Men’s Singles SL3.
- U Singhraj Adhana uwa yoh Takma Rupa ha ka Mixed P4 50 metre pistol SH1.
- U Manoj Sarkar uwa da yoh Takma Tama ha ka Badminton Men’s Singles SL3.
Wa kini ki soo tylli ki takma, ka India da yoh ko kattu hadooh 17 tylli ki takma ha kani ka lympung Paralympics iwa man iwa boon dooh na waroh ki Summer Paralympics wa da chimbynta ka ri.
Heiyatoh wa ini i yoh Takma ka ri hadooh soo tylli neiliang u Montri ka chnat Youth Affairs and Sports ka sorkar pyrdi da ong u wa man ko ka sngi wa sahkynmoo wei da man ko leh ka sngi wa sñiawsarong heiwa da yoh ki khloor yalehke hadooh kat kini ki takma.
Kani ka lympung Paralympics daw kut ko mynstep ka 5 tarik wei ka khloor siat suloi ka ri ha kani ka lympung, ka Avani Lekhara daw rah ko ya ka lama ka ri heipor wa pynhaap pyrda ya kani ka lympung.
Kam wow pynkynmoo heini ka Avani da yoh ko ar tylli ki takma ha kani ka lympung wa kynthup ya ka Takma Ksiar ha ka Women’s R2 Meter Air Rifle Standing SH1 wa ka Takma Tama ha ka Women’s R8 50 Metre Rifle 3 Positions SH1.
