Ka sorkar pyrdi, ka sorkar Meghalaya waka World Bank da soi ki ya ka soskular wa $40 Million yow pynmiat ya ki thaw sumaar hapoh ka jylla wei wow pynkhlan ya i rukom e sumaar wa jhan namo Emergency kam ha ka kjut khlam COVID-19.
Ka Meghalaya Health Systems Strengthening Project toh ka wow yarap pynmiat ya ki thaw sumaar wei i rukom pynkrehkaam ya ki, wow pynkhlan ya ka Health Insurance Program, wow pynbiang ya ki dawai wa kiwi kiwi.
Waroh ki 11 District ka jylla u yoh myntoi ki na kani ka Project heiwa ki wakreh ha i chait i khiah ha kiwa boon rukom daw yoh ki yei esikai wa rap miat wei daw yarap ya ki kynthai u yoh myntoi bha na i rukom chah sumaar ha ki thaw sumaar wa em pyn ha ki chnong ki.
Ka Department of Economic Affairs, Ministry of Finance da ong ko wa i pynkhlan ya ki thaw sumaar toh i mat wa kongsan bha ya ka sorkar pyrdi heiwa daw pynjanai bha ya ki rukom e sumaar ya ki paidbah khamtam kiwa duna hei yoh i laa.
Ya kani ka soskular da soi da u Rajat Kumar Mishra, Additional Secretary, Department of Economic Affairs, Ministry of Finance yong ka sorkar pyrdi; u Ramkumar S, Joint Secretary, Department of Health and Family Welfare neibynta ka sorkar Meghalaya wa u Junaid Ahmad, Country Director, India neibynta ka World Bank.
Kani ka Project daw yarap ko leh u pynkhlan yei rukom krehkaam ka Megha Health Insurance Scheme (MHIS)-kawa katni da kynthup hadooh 56% ki manyung wei deiwa pynyabi ya ka wa ka Pradhan Mantri Jan Arogya Yojna (PMJAY), ka MHIS daw ye ko u kynthup ya 100% ki manyung wei ini daw yarap bha i hei wow su ya ka bai sumaar yow lait ki bru wow sai napoh kata.
Chooh chooh kani ka Project daw pynwandur ko yei rukom pynlai poisa heiwa u man i katkam ki kyndon ka Internal Performance Agreements (IPAs) hapyrdi ka DoHFW wa kiwa hapoh yong ka wow wanrah yei khooid heiyatoh wa ki kaam poisa. Heijooh i por daw sdang ko leh wow wanrah ya i rukom pynkrehkaam ya ki Scheme wei wow pynkhlan ya ka chnat Insurance Agency ka jylla.
Heijooh i por kani ka Project daw yarap ko leh ya ka jylla wow yakhun pyrchah ya ki kjut wa ki khlam wa kiwi kiwi ki kaam wa yatoh wa i chait i khiah.
Da pyntip leh wa deiwa pynkhlan ya ki thaw sumaar daw mih leh chiboon ki jakhlia wa ki jhep na ki thaw sumaar (Bio-Medical Waste) kam ki Plastic ki tiar sumaar iwa daw ktah ya ka rymaw wei lyngba ka Project daw ye ko wow yarap heiwa kammon u leh ya ini i jakhlia wa i jhep heiwa da bhah jar jiar i man i long ki jhep ki jakhlia, kammon wow pynlang ya ki wei wow noh ya ki khnang wow yada ya ki bru wa ka rymaw.