U District Transport Officer ka East Khasi Hills District chirup wa ki bor District kamjooh ki pulit da pynkut ki yaka National Road Safety Month 2024 ha Parking Lot wa em mar pyrchah waka SBI Main Branch, Shillong.
U Superintendent of Police (Traffic), u K. Prasad da ong u yow chngaaiñ kiwa yah kari kamjooh ka kiwa lai wa wan da pynman yaka National Road Safety Month ha waroh ka India.
Da ong u wa man-u-snem da ki hajar wa yap nei tyrrah kari wei ini toh nei yah habra, i yah smat wei i wym bood ya ki kyndon wei wym burom leh yei hok yong kiwi.
Da ong u leh wa ha u snem wa dadep ka Meghalaya Police da Register ki 46 tylli ki mukotduma wei na kini 40 ngut wa yap wei na iwa jia da em 15% kiwa mynsoo katwa du ha u Duyatra (Jan) 2024 da Register 6 tylli ki Case wei na kini da em 6 ngut wa yap wa 13 ngut wa mynsoo.
U Prasad da kyntu u ya kiwa yah kari wa ymtoh u knieh pali ki khamtam ha ki sarok wa khian ha Shillong neibhah i kitkhlieh yei mynsien yong idæ kamjooh yong kiwi chong i ha kiwa yah kari.
Ka Deputy Commissioner East Khasi Hills District, ka R.M Kurbah da ong ko wa uni u bnai man u uwa kordor neibhah wa da yaklam ya i mynsien bru iwa kordor wei ymtoh u kheiñstiñ yeini.
Da ban joor ko leh wow pynman kam kini ki pynsñiawthooh heipor cheipor.
Ka Kurbah da kyntu ko leh ya ki manbei manpa wow em i kitkhlieh deiwa sneiñ ya ki khon ya ki kyndon neibhah lada tyrrah ki khon ya kiwi, ki manbei manpa wa hap u kitkhlieh.
Discussion about this post