U DHS (MI) ka jylla u Dr. Aman War da pyntip u wa hadooh 1 waje ynne i sngi ka 25 tarik, kiwa dang yoh COVID-19 hapoh ka jylla Meghalaya da em ki 42 ngut, katwa kiwa dang chait da em ki 43 ngut.
Na kiwa dang yoh thymme, da em 31 ngut ha East Khasi Hils kiwa kynthup ya 21 ngut ki bru paidbah wa 10 ngut ki chnat chipai. Ha Ri Bhoi 3 ngut, North Garo Hills 1, West Jaiñtia Hills 1 wa ha West Garo Hills 6 (1 u chipai wa 4 ngut ki bru paidbah).
Kiwa dang chait da em 3 ngut na East Khasi Hills, Ri Bhoi 7 ngut (4 ngut na ki chnat chipai wa 3 ngut ki bru paidbah), West Garo Hills 32 (25 ngut ki bru chipai wa 7 ngut ki bru paidbah) wa ha South West Khasi Hills 1.
Ki bru paidbah wa dang yoh thymme ha East Khasi Hills, 16 ngut toh ki High Risk Contact na Kamakhya, Punjabi Line, Lumparing, Mawlai Umjaiur, Mawtawar, Barapathar, Dhankheti 2 ngut ki wakreh LIC, Langkyrding, Rilbong, Nongkseh, Bishnupur, Barapani. Kiwi won toh 1 wa em ya i chitom Influenza Like Illness (ILI) uwa lai phah pynyoo ha Hospital, 1 na Woodland Hospital wa leh daka Test paidbah, 2 ngut na NEIGRIHMS wa leh daka Test Paidbah wa 1 wa liwan na baar jylla.
Ha Ri Bhoi, 1 toh wa yoh ya ka chitom Influenza Like Illness (ILI), 1 wa liwan na baar jylla wa 1 wa leh yaka Immigration Check. Ha North Garo Hills 1 toh High Risk Contact, ha West Garo Hills toh 4 ngut ki High Risk Contact wa 1 wa liwan na baar jylla wa ha West Jaiñtia Hills 1 wakreh kaam Lab Technician ka MCH, Jowai.
Kiwa dang em ya u COVID-19 ha ki District man ki kamni ha wah:
East Khasi Hills-797 (512 ngut ki bru paidbah wa 285 ngut na ki chnat chipai)
West Khasi Hills-43
Ri Bhoi- 94 (70 ngut ki bru paidbah wa 24 ngut na ki chnat chipai)
West Jaiñtia Hills-3
East Jaiñtia Hills-12
West Garo Hills-197 (123 ngut ki bru chipai wa 74 ngut ki bru paidbah)
South West Garo Hills-4
South Garo Hills-12 (10 ngut ki bru chipai wa 2 ngut ki bru paidbah)
East Garo Hills-3
North Garo Hills-13
Waroh kiwa dang em ya uni u khñiang da em ki 1178 ngut, kiwa chait 832 ngut, kiwa yap 8 ngut iwa da poi 2,018 ngut kiwa da dep yoh COVID-19 ha Meghalaya.
Ki nongmuna kiwa da dep phah Test da em ki 76,762 tylli, kiwa ym em chah ktah da em ki 74,293 tylli wei dang yang ka Result ki 451 tylli.
Kiwa psiah chapoh ka jylla da em ki 30,755 ngut.