Ka Meghalaya Jeet Kune Do Association (MJKA), kawa da seiñ nyngkong ha Meghalaya nadooh u snem 2012 dadep pynman ko hadooh 6 tylli ki lympung State Level Jeet Kune Do Championship wei hanla da tipmit ya ka da ka sorkar hadooh katni leh ympu yoh yarap ko iwon iwon leh.
Ka MJKA daw pynman ko ya ka 7th Jeet Kune Do State Level Championship ha ka tayaw wa khaddooh u Naiynñiaw 2022.
Ynnin ka 12 tarik ki khynnah da lai chimbynta ki ha ka 9th Northeast Jeet Kune Do Championship kawa man ha Cotton College Indoor Stadium, Guwahati, Assam heiwa ki dkhot ka MJKA da yoh ki hadooh 26 tylli ki takma Ksiar, 14 tylli ki takma Rupa wa 2 tylli ki takma Tama.
Ka Jeet Kune Do toh ka jait yalehke wa em hapoh ka Martial Arts kawa da chem da u Bruce Lee ha ki snem 1970 wei ha Meghalaya da wanrah nyngkong da u Donny R Ranee ha u snem 2012.
Ki dkhot ka MJKA da dawa ki wa ka sorkar wa ka MSOA da toh wow tipmit noh ki ya kani ka jait yalehke hapoh jylla khnang wow ye u kyntu kynrong ya ka wei wow chem leh ya ki khynnah wa em sap ha kani ka jait yalehke.
