Ka yung bichaar ynne da phah kset ko 5 sngi ha kti ki pulit ya ki 5 ngut kiwa da suba wa emkti wow dat ya ki arngut kiwa kamai Taxi iwa da jia hei miet ka 18 tarik iwa da wanrah yei yakhih kiwa kamai Taxi ynnin ha thaaiñ Khyndailad, Shillong.
Kini ki 5 ngut toh kiwa da kem ki pulit na Guwahati wei neiliang ki paidbah da kwah ki wow tip yei pyrtuid wei dur yong kini yow pynsakhiat wym em leh kyndeh ki pulit yei kaam yong ki.
Kamtæ kiwa yah Taxi da yalang ki hakhmat ka Sadar Police Station deiwa dawa wow yoo ya kini ki bru dei khmat yong ki.
Neiliang ki dkhot ka Harijan Panchayat Committee (HPC) leh da lai ki cha ka Police Station neidaw wa kwah ki wow pyntikna lada kini kiwa chah kem toh kiwa sah ha Them Metor neibhah da poor ka khubor wa kini toh ki jaitbru wa sah ha Them Metor.
Tangwa neiliang ki pulit ym bien ki wow khana iyi iyi leh wot ya kiwa kamai kari deiwa kyrpaad ya ki wow kyrchaan ki yei takit ki pulit wei yei pyntikna wa kini ki bru toh kiwa emkti da kiwa sakhi daw khut pynman da ka yung bichaar.
Heiyatoh wa iwi i Video wa da poor wa mih kiwa sah ha Them Metor deiwa rah wait (Talwar), rah dieñ, neiliang u General Secretary u HPC, u Gurujit Singh da ong u wa da em kiwa kawang mooh ya ki yung ki bru wei da ya mih ki yow tip kiyi wa leh yeini, heijooh i por leh da kyntu u ya ki bru wow man kiwa jai-jai yow wanrah yei suk.
