Ynnin i miet ka 10 tarik da em i tyrrah kari wa chyrkhei bha ha Mihmyntdu hajan Madan Wahriong heiwa heipor 7:40 da em kawi ka kari Bolero Camper wa em Number ML-04D-8952 wa yah da u Dominic Pasi (25) na chnong Nongjngi da wan u neiliang Lathadlaboh wei mar ya poi ha ini i thaw kani ka Bolero Camper da tyrrah ko ya ka Bolero wa em Number ML-01-7922 na ka chaka dien.
Kani ka Bolero toh kawa pynemkaam da u DTO ka East Jaiñtia Hills wei embhah ym em wa mynsoo hapoh ka Bolero.
Hadien wa tyrrah ya ka Bolero u DTO, kani ka Bolero Camper da tyrrah ko ya ka Taxi wa em Number ML-04D-7572 wa yah da u Pyndap Dhar (27) uwa na Ialong heiwa da takha joor bha ko wei da mynsoo uwi hapoh ka Taxi wei da kit wut-wut cha Jowai Civil Hospital, Ialong da kiwa lai luti.
Chooh chooh kani ka Bolero Camper hadien kamwa 25-39 meter da tyrrah ko sa ya ka kari Breeza wa em Number ML-04D-8095 kawa da pynyieñ na tidiang u sarok heiwa da pra kani ka kari.
Hadien ini, kani ka Bolero Camper sa kamwa 20 – 25 meter haphrang da tyrrah ko sa ya ka kawi won ka Taxi wa em Number ML-04D-7427 wa yah da u Lakhon Khariah (45) na Nongjngi heiwa da mynsoo u wei da kit noh cha Jowai Civil hospital.
Neini ka Bolero Camper da tyrrah ko sa ya kawi ka Taxi wa em Number ML-04A-0721 wa pynyieñ harood sarok.
Neiliang ki pulit da chem ki wa u Dominic Pasi toh uwa da muaid wei da kit ya oo wow leh yeiwa emkaam.
Ya ki kari wa chah tyrrah da kit cha Police Reserve Jowai wei da phah ya ki tre kari wow wan mih cha Jowai Traffic Branch.
Discussion about this post