Hadien wa ini wadep da em soo ngut kiwa da chah thok ha ka Roshni Chettri (40 snem) wow thied thuk-thuk hei pyrtuid yong ki heiwa ya ka ram (EMI) u so ko da ka, kattæ won da em hadooh 53 ngut ki bru wa da chah thok ha kani ka jooh ka bru kawa sah ha Pynthorumkhrah, Shillong.
Katkam wa khana da ki kattu katni ngut ki khynroo kiwa da chah thok, da ong ki wa ka Roshni da ngooh ko ya ki wow chim ram yow thied ya ki ar chaka wa kynthup ya ki Bike wa Scooty hei pyrtuid yong ki hi, katwa ya ka Down Payment wa ka EMI daw su hi da ka, tangwa da khyrngiat ki wow yoh Phone na ki Bank deilang ki Notice wa hap ki wow su ya ka EMI.
Kini kiwa chah thok ki wym kwah wow pynmih pyrtuid da ong ki wa manda Phone ki cha ka Roshni, da maham kylla ko ki hadien wa lai booh ujor FIR ki wei da phla ko leh wa dadep dai ko ya kini ki Bike wa ki Scooty tangwa da klam heh ko leh wym su ko ya ka EMI.
Da khana ki leh wa heipor wa ka FKJGP Nongmensong da taan ko ya kani ka bru cha ka yung krehkaam ko, da phla ko wa da dai ko ya kini ki Bike deiwa khana leh wa da em hadooh 70 tylli ki ujor ha ki thanat yeini wa da leh ko.
Hawa kylli, kini kiwa chah thok da khana ki wa da tipmit ki ya kani ka bru lyngba kiwi, wei ka Roshni da paan yarap ko na ki wow thied ya ki ar chka hei pyrtuid yong ki deiwa kular wow su ya ka EMI wei wow e kreh leh ya ki ha ka thaw e wai ya ki ar chaka wa em ko ha Polo, iwa pynchaniah ya ki.
Da khana ki leh wa em na ki kiwa da chna PAN Card yow wai Bank Account du neibynta wow leh yeini waroh.
Hawa kylli chooh chooh, da kyntait ki wa da paan poisa ki na kani ka bru, tangwa hadien wa dep sai ya ki Bike ki Scooty, da e burom ki ya ka Rs. 4000 samen. Da khana ki leh wa em na ki kiwa sah ram Rs. 1,20,000 hadooh Rs. 2,00,000.
Puræ leh: Chah thok ki soo ngut ki chynrang ha Shillong wa thied thuk-thuk ha kawi ka bru wa kular u su
Discussion about this post