54 ngut kiwa yalehke ka India daw lai chimbynta ki ha ka Paralympics kawa tip kam ka Tokyo Paralympics kawa daw sdang ha ka 25 tarik uni u bnai wei kini ki 54 ngut toh kiwa man kam chibynta ka Target Olympic Podium Scheme (TOPS) wei da man ki leh ka kynhun wa boon dooh kiwa da mihkhmat ya ka India ha ka Paralympics.
Ka Paralympics man ko ka yakob neibynta ki bru wa em i duna hei doh i pran
Ki 54 ngut daw chimbynta ki ha ki 9 tylli ki jait yakob wa kynthup ya ka Archery, Athletics (Track and Field), Badminton, Swimming, Weightlifting wa kiwi de.
Ka Bhavina Patel waka Sonalben Patel, toh kiwa na ka jylla Gujarat, heiwa ka Bhavina daw chimbynta ha ka Para Table Tennis Women’s Singles Wheelchair Class 4 Category katwa ka Sonalben won haka Women’s Singles Wheelchair Class 3 Category. Chirup daw chibynta ki ha ka Women’s Doubles.
Pyn-ar toh kiwa da dep yoh ya ka Sardar Patel Award waka Eklavya Awards wei da dep yoh takma ki leh ha ka Asian Games. Ka Bhavina toh kawa em hei kyrdan wa 8 ha pyrthai ha ka kyrdan wa yalehke ko.
Ka Aruna Tanwar (21 snem) won da bood ko ha ki dak kjat ki payu ko, heiwa ka u mihkhmat ko ya ka India ha ka Para Taekwondo. Ka Aruna toh kawa na Haryana wei daw chimbynta ko ha ka Women’s Under 49kg K44 Category.
Ka Aruna toh kawa em ha ka kyrdan wa 30 (Ranking) ha ka kyrdan K44 Category, wei da dep ko leh wow yoh takam rupa ha ka Asian Para Taekwondo Championship ha Vietnam ha u 2018 kamjooh ya ka takma tama ha ka World Para Taekwondo Championship ha Turkey ha u 2019.
Ha ka Para Powerlifting, ka India da phah ko ya ki arngut kitæ u Jai Deep waka Sakina Khatun. Ka Sakina toh kawa da kha ha West Bengal, wei da pyndep ko yei pynkhreh ha SAI National Center of Excellence, Bangalore, katwa u Jai Deep toh uwa na Haryana wei da pynkhreh u ha Rajiv Gandhi Stadium, Rohtak.
Ka Sakina daw chimbynta ko ha ka Women’s up to 50kg Category, wei da man ko leh ka kynthai wa nyngkong na India kawa yoh takma ha ka Commonwealth Games kawa da yoh ko ha u snem 2014 ha Glasgow. Da yoh ko leh ya ka takma rupa ha ka Para Asian Games 2018. I tkoh ka Sakina toh neidaw wa yoh Polio ko nadooh wa dang khonboo.
U Jai Deep daw chimbynta u ha ka Men’s up to 65kg Category, wei man u leh kam u Assistant Coach ha ka Sports Authority of India.
