Kam chibynta wow pyndooh yei khai ksiar tooh ki bru hapyrdi ka Myanmar-India, ynnin ka sngi ka Delhi Zonal Unit yong ka Directorate of Revenue Intelligence (DRI) da toh kem ko hadooh 55.61 kg i ksiar wa chongdor T. 28 klur na ki 8 ngut ha Delhi wa Lucknow.
Hadien wa yoh yutip wa tikna ka DRI wa em i ksiar wow khayi tooh na Myanmar cha India da sdang ko wow booddien yeini neibhah wa da joor i khayi tooh katni khamtam hadien wa kut ka Lockdown COVID-19.
Ynnin ka sngi, u Minister of State for Finance and Corporate Affairs u Anurag Singh Thakur da lai u cha ka yung krehkaam ka DRI, Delhi Zonal Unit wow e khublei ya ki sahep ka DRI.
Neiliang u Thakur da yaroh u ya ki kaam wa da leh ka chnat deiwa kyntu leh wow pteiñ ki ya ki kaam yong ki neini chaphrang.
Ka DRI da pyntip ko wa katni kiwa khayi tooh da kylla ki neiwa kit yei ksiar hapoh kari deiwa murieh hapoh doh bru wei ya kani ka kdong ya kiwa khayi tooh katni da e pyrtuid kam ka “Golden Triangle”, kawa da leh da ka Delhi Zonal Unit waka Lucknow Zonal Unit ka DRI, heiwa ya ini i ksiar da chem kiwa thap ha ki snieh-tympong namo ki Belt heiwa 5 ngut ki bru da yoh kem da ka Delhi Zonal Unit hajan Delhi katwa 3 ngut won da yoh da ki bru ka Lucknow Zonal Unit ha Lucknow.
Hawa kynreh ya kini ki bru da chem ya 335 tylli ki Gold Bars kiwa khia 55.61 kg. Ya kini ki 8 ngut da kem wei ka takit dang lai ko chakhmat.
