U Montri Rangbah ka jylla, u Conrad K Sangma hawa e yei klam ynne ka sngi wa sdang ka dorbar mang tangka, da e u ya ka Suo-Moto Statement hapoh ka yung dorbar heiyatoh wa iwa jia ha ka krem mooyong wa em ha Mynsngat-Thangskoo deiwa pyntip u wa kiwa yap waroh hadooh ynne ka sngi da em ki 33 ngut.
Da ong u leh wa kani ka thaw tih mooyong man ko pyrchah ya ka aiñ wei ha ka 5 tarik uni u bnai da em i pdung wei pyn ha kani ka sngi wa jia da chem 18 tylli ki metyap na kani ka thaw.
Ha ka 6 tarik da chem soo tylli ki metyap katwa ha ka 7 tarik won da chem ar tylli wei da pynsangeh yei thooh ya kiwa chah ktah hei janmiet ka 9 tarik heipor 5:00 waje.
Na ki 8 ngut kiwa mynsoo kiwa da ye u sai, 4 ngut da yap ki ha NEIGRIHMS wa Agie Hospital Beltola, Guwahati ha ka 6, 9, 10 wa ka 11 tarik. Da em leh ar ngut kiwa yap kiwa da pyntip da kiwa ha-yung ha-sem.
Ka poisa wa da e yarap cha kiwa yap dapoi ko Rs. 24 lak neibynta ki 8 ngut wei ya kiwi daw e yarap manda ye ki wow pynbiang ya ki kot ki sla.
Heiyatoh wa ini wa jia da kem leh 7 ngut ki bru wei da em 62 tylli ki FIR kiwa da e hadooh ynne ka sngi wei na kini 57 tylli toh kiwa da e hadien wa jia katwa 5 tylli won toh chwa iwa jia. Wei kini ki 62 tylli ki FIR man ki neibynta ki kaam tih mooyong pyrchah aiñ.
Najrong ki 7 ngut kiwa chah kem heiyatoh wa iwa jia ha Mynsngat-Thangskoo da kem leh sa 7 ngut heiyatoh wa kiwi ki kaam pyrchah aiñ wa yatoh wa u mooyong.
U mooyong wa da yoh u kem hadooh ka 14 tarik uni u bnai toh 15,224.72 MT. Da lai tympra leh 6 tylli ki Crane hadooh ka 13 tarik wei dang pteiñ yeini. Da kem leh 6 tylli ki kari kiwa kit mooyong pyrchah aiñ hadooh ka 13 tarik hi. Neitæ da sdang leh ki pulit wow pynemkaam da ki Drone yow pait ya kini ki kaam tih mooyong pyrchah aiñ.
Da pyntip u leh wa chwa wow jia ini, ki bor District deilang ki pulit da pynsangeh ki ya ki kaam tih mooyong pyrchah aiñ heiwa ha u 2025 da em 4 tylli ki Case wa da Register pyrchah ya kiwa tih mooyong pyrchah aiñ kiwa da chem deiwa pynemkaam da ki Drone. Wei da kem leh 11,182 MT u mooyong wa tih pyrchah aiñ najrong wa da kem leh ya ki Crane, ki Generator wa pynemkaam yow tih mooyong pyrchah aiñ.
Discussion about this post