Jowai: U Chief Electoral Officer ka jylla u FR Kharkongor hawa yachem u wa kiwa thoh khubor ynne i janmiet da ong u wa hadooh wa dang yoh yukheiñ i mih ki paidbah wow thap cha ka 1-Shillong Parliamentary Seat da poi ko kamwa 63.56% katwa ha ka 2-Tura Parliamentary Seat da poi ko kwam 75.60% wei deiwa kheiñlang waroh da poi ko 67.03%.
Da ong u leh wa ini dang ye ko wow ku neidaw wa dang yang ya ka yukheiñ sa na ki 600 tylli ki Polling Station.
Ha ka Election chiteiñ samoi hapoh ka Selsella Legislative Assembly kiwa thap Vote wa wan chakhmat da poi ki 82% wei man leh ko kawa suk wa kawa lai bait wei dang leh ya ka yukheiñ sa na ki kattu katni ki Polling Station.
Da ong u leh wa em i sih ki kattu katni ki kor VVPAT ha ki kattu katni ki Polling Station wei da kylliang ya ki katkam ki kyndon wa da booh da ka Election Commission heiwa da sakhi ki Election Observer wa ki Polling Agent.
Kam wow pynkynmoo wa ha Meghalaya em ar tylli ki Parliamentary Constituency, ka 1st Shillong Parliamentary Constituency wa ka 2nd Tura Parliamentary Constituency. Na Shillong kiwa yakhun ya kani ka Election toh u Vincent H Pala (INC), u Dr. Jemino Mawthoh (UDP) wa hunlang ka sorkar MDA, u Sanbor Shullai (BJP), wa le ngut kiwa yakhun kam ki kyrtong samen wa kynthup ya u THS Bonney, u Romeo Phira Rani wa u Samuel Hashah.
Na ka 2nd Tura Parliamentary Constituency, kiwa yakhun toh u Dr. Mukul Sangma (INC), ka Agatha Sangma (NPP) kawa man leh ka kyrtong hunlang ka MDA wa u Riman G. Momin (BJP).
Discussion about this post