U Director General of Police (DGP) ka Meghalaya, u Dr. LR Bishnoi ynne da pyntip u wa da em waroh 16 tylli ki Case kiwa da Register wa 69 ngut ki bru kiwa da chah kem heipor wa pynman ya ka Election MLA 2023 ka jylla.
U DGP da khana u leh wa da em waroh 13 tylli ki Case wa da jia chwa ka Election wei 3 tylli won hadien ka Election. Chooh chooh da khana u wa da em 56 ngut kiwa chah kem chwa ka Election wa 13 ngut won hadien ka Election.
“Ha kiwa boon ki thaw ka Election man ko kawa suk tangwa da em boon kiwa da chah kem. Ki mar wa da chah kem da man ki leh iwa heh dooh ha ki 50 snem wa da yoh ya ka jylla. Waroh dapoi awjan T. 77 klur iwa da yoh kem iwa da man phra chah ya iwa da yoh kem ha ki snem nachwa,” da ong u DGP.
Da pntip u leh wa ki pulit ha kini ki por Election da yoh ki wow kem ka poisa kawa T. 3.06 klur, i kiad wa chongdor T. 1.95 klur, i drug wa chongdor T. 12 klur, T. 30 lak i ksiar wa T. 30 lak ki mar.
Kam wow pynkynmoo na ki 3 tylli ki jylla wa da pynman Election, ka Meghalaya da yoh nyngkong ko ha iwa da yoh kem hawa nujor wa ka Nagaland wa Tripura.
U DGP da khana u leh wa ki pulit ka jylla ha kini ki 6 bnai da yoh ki wow kem boon ki jait dih pynmuaid kam ki drugs wa kiwi de iwa man leh iwa boon dooh ha ki 50 snem nadooh wa yoh ya ka jylla.
Da kdaw u leh wa kiwa boon kiwa dai drugs hadien wa yoh jamin ki da pteiñ ki wow dai drugs, kamtæ da chim ya ka rai wow pynkrehkaam ya ka PITNDPS Act 1985 kawa em ka kyndon wow kseh kam wow khanglaad.
“Da phah i 10 tylli ki e buit (Proposal) cha ka sorkar kiwa dang chong pyrkhat ki wei da dep thung leh da ka Advisory Board wei mar ya yoh yei mynjur, kiwa myllien wow leh yei jooh ye wow phah kset patok ki hanla ym chem drugs na ki,” da khana u.
Da ong u leh wa man ko i kaamram yong i uwi pa uwi wow pyntkut ya uni u kynjri hapyrdi kiwa dai wa kiwa pynemkaam.
