Ka yung bichaar ka B. Khriam, Special Judge (POCSO), East Jaiñtia Hills District da rai pynrem ko ya uwi heiyatoh wa i thmu u wow slaitbor ya kawi ka khynnah deiwa chah phah kset oo 7 snem.
Kani toh ka mukotduma pyrchah ya u Peitlang Bamon wa haap hapoh ka Khliehriat Women Police Station kawa em Case Number 32(08)2021 wei da takit da ka WP-Inspector O. Tyngkan heiwa da Chargesheet ya u Peitlang deiwa pynngat hapoh ka kyndon 7/8/11(i)/12/18 ka aiñ POCSO.
Katkam ka FIR wa da e da u pa ka khynnah, ini toh iwa da jia ha ka 24-08-21 heiwa u Peitlang Bamon da lai u cha i yung kani ka khynnah wa dang 14 snem heiwa da emlang ko wa u diah ko khlem da em ki waheh heiwa u Peitlang da e poisa u ya u diah ko yow lai thied jhoor u wei heini i por da khang u yei dwar yung wei da wan u cha kani ka khynnah kawa dang sait tiar heiwa da taan u ka cha kawi won ka kamra wei da pyrchang u wow slaitbor ka heiwa da tba u ka leh deiwa khlem akor tangwa manda sdang ko wow kiad da pynlait u ka wei da yoh ko wow yut deiwa yaam wei da yoo kawa emyatoh ko yeini wa yaam ko heiwa da khana ko yeiwa jia.
Da pyntip leh ha ka yung bichaar wa Peitlang chwa wow pyrchang u wow slaitbor ya kani ka khynnah heipor wa dang chet ja ko da wan u wow chong hajan ko heiwa da ong u ya ka wa ka toh kawa miat kynthai wei da tyrwa u bia ya ka tangwa da kyntait ko neidaw wa da em kurim wei da tyrwa u ka leh da ka poisa lada bien ko tangwa kani ka kynthai da kyntait wei da lai ko cha kamra sait tiar.
Hadien wa pyndep yei bichaar, ka Special Judge (POCSO) da rai pynrem ko ya u Peitlang Bamon deiwa phah kset ya oo 4 snem wa 3 snem hapoh ka kyndon Section 8 wa 12 ka aiñ POCSO deilang ka kuna wa Rs. 20,000 wei lada ym su ya kani daw hap chong patok sa chi bnai.
Da phah leh wow e yarap cha ka khynnah Rs. 1,50,000.
Discussion about this post