Ka seiñ Federation of Khasi Jaiñtia & Garo People (FKJGP) Lama Unit, East Jaiñtia Hills ynne ka sngi hapoh i yahkhmat u President, u Lamchwa Dong deiwa synraanlang lang u President ka FKJGP South Eastern Border Area (SEBA) Circle, u Mathew Pajat da booh ki yei ujor heiyatoh wa i thut ka Network Jio wa em ha chnong Lama ha u Jio Centre Manager, u Pebam Laigam wa em ha Ladthadlaboh, Jowai heiwa da dawa wow pynbiang Network ha katai ka chnong heiwa ki paidbah da sñiaw ngiah ki yei thut Network.
Ka FKJGP lyngba ka chithi da ong ko wa da em i thut bha i krehkaam ka Network heiwa haka chi tayaaw da thut hadoh 2-3 sngi ka Network wei ka Network leh da sangeh krehkaam ko mar sein dooh bordiñ.
Da ong leh wa ini i thut ka Network da ktah bha ko yaki paidbah neibhah kamwa man kattæ toh du ka Tower yong ka Jio donhi wa em ha kani ka chnong wei manda dooh Network kamjooh ka Internet da wanrah ko yei eh haki kaam kiwa boon jait yong ki paidbah wa pynemkaam da ka Mobile Phone kawa ym hoi de u dooh ha kini ki sngi.
Kamtæ neiliang ka FKJGP da klam che ko ha kani ka chithi ujor wow pynbiang Network hapoh 7 sngi wei lada kani ka Company ym ye ko u leh yeiwa emkaam u paidbah heiwa ka bai Mobile da hap u thap thij thij man-u-bnai tangwa da yoh won u pynemkaam du kajiak sngi haka chi bnai iwa da pyndooh nong ya kiwa pynemkaam ya kani ka Simcard ka jio, da ong u Lamchwa Dong. Wei lada jia wa pep kani ka Company wow chimkhia yeini i dawa, ka seiñ ym yohsa ko wow chim da kawi ka luti deilang waki paidbah yong ka chnong.
Hawa yoh u yaklam wa u Bhaskar Borgohain uwa man leh kam u Tower Operation & Maintenance, da kular u wow chimkhia yeini i ujor ka seiñ wei da yoh u leh u pynsñiaw wa kawi na ki daw wa pynman u thut i chakri yong ki toh wa neidaw wa em i thut lyngba ki sainar Fibre wa pynpoi yaka Network wei da em leh ki jait jait thaw wa em i chah daiñ chah pyntkut kulmar ki Fibre. Kamtæ da ong u wa emkaam i ya krehlang ki paidbah deilang waka seiñ.
Neilang u Mathew Pajat da ong u wa i chna yaki Fibre man ko ka kreh wa tang dep heiwa i rukom pynlai yaki Fibre toh napoh khyndaw tangwa deiwa tbian bha wei da pynlai kulmar kat nawa yoh hi-eh i thaw wa yoh u pynlai la napoh kynroh sarok, na khloo leh wei da leh tang dep.
Kamtæ ka seiñ da ong wa smat ko wow leh da ka Joint Inspection wow thooh yei sakhiat khnang wa ka Company wym ye ko wow e daw kulmar yei wym ye ki u e chakri wa bha kamwa toh u e katkam ka kular ya u paidbah wei ymtoh u smat ko u Phone tang du hawa da kut Bill ki paidbah katwa ka Network won da kawa thut man-i-por, ong ka kyrwoh na ka seiñ.
Discussion about this post