Ki pulit ka East Khasi Hills ynne sngi da rah ki yow kylli takit ya 2 ngut ki dkhot ka Khasi Students’ Union (KSU), wei neiliang ka yung Kasari yong ka District Session Court ka East Khasi Hills da e bor ko ya ki pulit wow booh 7 sngi ya kitai ki ar ngut ha kti ki pulit yow takit ya ki.
Ki ar ngut ki kiwa da rah ynne i step synyaaw ha ki pulit toh uwa tip kam u Shaborlang Shati uwa da kem na Wah Utim wa u Mesadapbor Skhembil uwa da kem na Saitsohpen, wei waroh ar ngut toh kiwa 26 snem i rta.
Ya kini ki ar ngut da kem yow takit hajrong i chah bom yap ya ar ngut ki Dkhar ha ka thaaiñ Ichamati ha ka 27 tarik u Wisu uni u snem.
Katkam wa khana u Superintendent of Police ka East Khasi Hills, u Rituraj Ravi, da ong wa hei booddien yei chah tynyap ki ar ngut ha Ichamati, ki pulit da lai ki wow kem noh ya kini ki ar ngut ynne i step synyaaw heipor 1:00 waje, wei da pyntip u wa ka Kasari da e bor ko ya ki pulit wow kset ya kitai ki 2 ngut hadooh 7 sngi neibynta wow takit.
Hawa kylli, u SP da ong u wa ka takit dang lai ko wei dang em sa kiwi de kiwa da suba wa emkti.
Hawa kylli chooh chooh, u SP u da ong u wa ki pulit da pynkhlan bha ki yei uiñ sonteri ha waroh kawi ka District, khamtam ha Shillong wa Ichamati.
Discussion about this post