Ka National Legal Services Authority (NALSA) ynne da pynman ko ya ka East-Zone Regional Conference hajrong ka phang “Enhancing Access to Justice” ha Taj Vivanta Hotel, Shillong wei da wan wow wai pyrda ya ka da u Justice Sanjay Kishan Kaul, Judge, Supreme Court of India uwa man leh kam u Executive Chairman, NALSA deiwa emlang u Justice Sanjiv Khanna, Judge, Supreme Court of India kam u symbood kongsan, u Justice Sanjib Banerjee, Chief Justice, High Court of Meghalaya uwa man leh kam u Patron-In-Chief, MSLSA, u Justice H.S. Thangkhiew, Judge, High Court of Meghalaya uwa man leh kam u Executive Chairman, MSLSA wa u Justice W. Diengdoh, Judge, High Court of Meghalaya uwa man leh kam u Chairman ka HCLSC.
Neiliang u Justice Sanjay Kishan Kaul da ong u wa i rukom kreh kiwa em ha ka kaam bichaar aiñ toh iwa deiwa pyrkhat jngai neibhah ini ymtoh iwa ye u leh du chi sngi lane chi snem donhi. I thong wa hakhmat iwa da wanrah wow chna ya ka aiñ Legal Services Authority Act toh yow e yarap wei yow yoh ki paidbah ki bru wa biang yow man salonsar khamtam kiwa dooh wa duk hawa hap ki wow yasaaid hakhmat ka aiñ.
Da kdaw u leh wa 70% kiwa dang chah bichaar kiwa chah kset toh kiwa na ki manyung wa dooh wa duk, wei 89% won toh kiwa ymtip u thoh u taar wei 72% won kiwa dang chah bichaar toh kiwa man kam ki jaitbru wa dang sahdien wei ini pynyoo ko katwon chah ktah wei hap ki wow kit neibynta ki kaam wa khian wa nai wa hap ki wow wan mih man-i-por cha ki yung bichaar wei ha kiwa boon ki por ki aiñ wow yada ya ki da chah tyngkheiñ ki.
Chooh chooh da ong u wa kam kini ki Conference ym toh u kut ki du ha ki kattu katni donhi ki jylla toh u pynman ki ha kiwa boon ki thaw yow sñiawthooh yeiwa eh wa maad ki paidbah.
Ha kani ka sngi, u kongsan deilang wa kiwi wa chah khut sñiawbha da pynlait ki leh ya ka Newsletter ka Meghalaya State Legal Services Authority kawa da e pyrtuid “New Light” Issue VII.
Ha kani ka sngi da yoh leh ya ka yaklam ya phyllu wa da chimbynta da ki dkhot ki State Legal Service Authority ka Arunachal Pradesh, Assam, Manipur, Meghalaya, Mizoram, Nagaland, Sikkim, Tripura, West Bengal waka UT Andaman & Nicobar kiwa da e yei klam hajrong iwa boon iwa eh wa da maad ki wei kammon da leh ki yow jop yeini.
