Ka 1st Meghalaya International Film Festival, kawa pynman da ka Meghalaya Filmmakers’ Association (MeFilma), hapoh i pait u Founder President ka seiñ, u Commander Shangpliang waka Meghalaya Tourism dapoi ko cha wakut ynne deiwa dadep pynyoo ya ki phlim wa har rukom heiwa da wan chimbynta ha kani ka tamasa da ki bru na kylleiñ ka ri India wa kamjooh na kiwi tawon ki ri.
Kani ka tamasa toh kawa sdang nadooh ka 14 tarik uni u bnai wei da pynyoo ya ki phlim kiwa da pawnaam bha na ka ri.
Da pynyoo leh ya ka phlim “Ka Synjuk Ri ki Laiphew Syiem (The Alliance of 30 Kings)” kawa da pynmih ha u snem 1981 da u Hamlet Bareh Ngapkynta uwa da pyrchang katwa ye u wow khana yei parom iwa da jai ha ki snem 1780-1819 ha ki por yaleh pyrchah ya ki pharæng wei kani da man ko ko leh kam ka phim Khasi wa nyngkong dooh wa jrong kam ka Feature Film kawa da neh parom ha ki kaam chna phlim ka jylla.
Da pynyoo leh ya ka phlim kawa na ri Vietnam kawa pyrtuid “Kieu” heiwa ha kani ka tamasa da chimbynta leh da u Director yong kani ka philm, u Cao Thai Ha wa kiwa chimbynta ha ka.
Da pynyoo leh ya ki phlim tbian kam ka “Lorni “, “Ka Chithi”, “ING 156”, “14/8”, “Kagaz ki Khasti”, “Anur”, “A Common Crime” wa ka “Joon.”
Ynne ka sngi pynkut ya ka tamasa da emlang ka Montri ka chnat Public Relations, ka Dr. M. Ampareen Lyngdoh kam ka kongsan ha ka yalang wa da pynman ha U Soso Tham Auditorium, Shillong wa u Actor ka Bollywood u Sanjay Mishra kam u symbood kongsan.
U Sanjay Mishra da kmen u wow yoo wa man kani ka tamasa kawa jop wei kyrmen u wa ha ki 10 snem daw man ko kawi na kiwa paawnaam bha ki tamasa ha ka ri.
Ka Ampareen Lyngdoh da ong ko wa ka sorkar jylla kular ko wow yarap ya ki bru wa em sap ha ka jylla wei u Montri Rangbah leh kwah bha u wow pynchlur ya kiwa em sap khnang wow lai ki ha ka luti wa biang.
