Kiwa dang yoh COVID-19 ha Meghalaya ynne ka 21 tarik da em ki 73 ngut, kiwa chait 15 ngut wa 2 ngut kiwa dang yap ha East Khasi Hills katkam wa pyntip u DHS(MI) ka jylla u Dr. Aman War.
Na kiwa dang yoh thymme da em ha East Khasi Hills 59 ngut (chipai-6, paidbah-53). Ha West Garo Hills 12 ngut (chipai-4, paidbah-8). North Garo Hills 1 wa ha West Jaiñtia Hills 1.
Na kiwa dang chait da em ha Ri Bhoi 4 ngut ki bru paidbah, ha West Garo Hills 6 ngut ki bru paidbah, ha South West Garo Hills 3 ngut ki bru paidbah wa ha East Jaiñtia Hills 2 ngut ki bru paidbah.
Na kiwa dang yap kawi toh kawa tip kam ka Jyotikha Ghosh (46 snem), Upper Jail Road kawa haka 19 tarik uni u bnai da pynkit cha Nazareth Hospital na Woodland Hospital kawa da Test daka Rapid Antigen Test wei da chem wa em ko ya u COVID-19 ha Woodland wei da khlaad ko haka 19 tarik heipor 6:20 i janmiet. Katkam wa yoh yutip na Nazareth, kani ka bru toh kawa chitom leh nei duna snam.
Ha NEIGRIHMS uwa kjtu uwa tip pyrtuid kam u Jyotimoi Sharma (48 snem) uwa na Tripura da lai u cha katai ka Hospital ha ka 8 tarik uni u bnai, hadien wa Test da chem wa da yoh u ya u COVID-19 wei da khlaad noh ha ka 19 tarik ha i por 5 waje i janmiet.
Ynne ka sngi ha NEIGRIHMS, u Ranjit Kumar Das (75 snem) uwa na Karimganj, Assam da li booh ya oo cha NEIGRIHMS ha ka 20 tarik uni u bnai uwa man leh uwa da Test chwa wei da chem wa em u ya u COVID-19 pyn na Assam uwa da phah sumaar ha kani ka Hospital tangwa da khlaad noh u ynne heipor 10 waje i step. Ya uni ym kheiñ kam uwa khlaad na u COVID-19 ha Meghalaya neidaw wa da Test chwa ya oo ha Assam.
Ki bru paidbah won kiwa dang yoh COVID-19 da em ki ha East Khasi Hills 48 ngut ki High Risk Contact, 2 ngut ki wakreh Health (1 Doctor ha Woodland wa 1 wa Test ha NEIGRIHMS na Mawlai Motsyiar), wa 3 ngut kiwa dang liwan chapoh ka jylla. Ha West Jaiñtia Hills 1 High Risk Contact. Ha North Garo Hills 1 wa dang liwan. Ha West Garo Hills 8 ngut ki wakreh Health ka Holy Cross Hospital.
Kiwa dang em COVID-19 ha ki District man ki kamni ha wah:
EAST KHASI HILLS: 1569 (chipai-245, paidbah-1324)
WEST KHASI HILLS: 13
SOUTH WEST KHASI HILLS: 6
RI-BHOI: 138 (chipai-42, paidbah-96)
WEST JAIÑTIA HILLS: 10
EAST JAIÑTIA HILLS: 273
WEST GARO HILLS: 129 (chipai-67, paidbah-62)
SOUTH WEST GARO HILLS: 14
SOUTH GARO HILLS: 8
EAST GARO HILLS: 5
NORTH GARO HILLS: 4
Waroh kiwa dang em ya u khñiang da em ki 2169 ngut, kiwa chait 2527 ngut wa 38 ngut kiwa yap.
Ki nongmuna kiwa da dep phah da em 1,33,259 tylli, kiwa ym em chah ktah (Negative) da em 1,27,589 tylli wei dang yang yaka Result ki 937 tylli.
Kiwa psiah chapoh ka jylla da em ki 38953 ngut.
