Ka lieñsuiñ ka Air India kawa emlang wa ki bru hapoh da hær ko deiwa bakla hadooh 8 kynta dei thmu wow lai cha Vancouver, Canada deiwa hap liwan biang cha Delhi ha ka 19 tarik uni u bnai.
Ka Air India da phah ko da ka lieñsuiñ kawa ym em yoh bor wow lai cha Canada.
Kani ka lieñsuiñ Flight AI185 da mih ko na Delhi heipor 11:34 i step deilang ki bru wei da hær ko cheiliang sepsngi wei dapoi ko chadooh China hajan Kunming chwa wow sñiawthooh wym yoh bor ko wow lai cha Canada.
Nadooh wa hær ko hadooh wa liwan biang da sepai i por 7 kynta wa 54 minit wei kat u ye ko u hiar da chimpor awjan dap 9 kynta.
Kani ka lieñsuiñ toh ka Boeing 777-200LR, tangwa ka Air India da yoh bor ko wow pynkrehkaam du ka Boeing 777-300ER yow lai cha Canada. I rukom e bor toh deiwa kheiñ ya ki jait lieñsuiñ wa kiwi de ki kyndon.
Hadien wa da tip yeiwa bakla da pyntip ya kani ka lieñsuiñ wow dong biang ko cha Delhi, wei neiliang ka Air India da ong ko wa em iwa bakla.
Ka Air India da yarap ko wow pynyoh thaw sah ya kiwa lai luti wei da pynkhreh ya ki yow poi ki chei thaw wa mut ki u lai.
Ini da man ko leh i lutsan ya ka Air India neibhah ki Boeing 777 da pynemkaam ki 8-9 Ton i phniang ha ka chi kynta.
Discussion about this post