Shillong: Kiwa yoh COVID-19 ynne ka sngi ha Meghalaya kiwa da pynbna nadooh ynne i step da em ki 8 ngut heiwa nyngong da pynbna ya 4 ngut kiwa na 13th Mile, Ri-Bhoi, 3 ngut ki BSF ha East Khasi Hills wei hadien kini da em sa uwi uwa na Khanapara-B uwa da pyntikna wa yoh COVID-19.
Hadooh ka 24 tarik u Naiynru da em sa du 4 ngut kiwa dang em ya u khñiang COVID-19, tangwa ha ki chiphaw sngi, ka jylla da sakhi ko wa da ku kiwa yoh ya uni u khñiang hadooh 22 ngut.
U Director of Health Services yong ka jylla, u Dr. Aman War da pyntip u wa haka jylla da em kattæ 26 ngut kiwa dang em ya u COVID-19.
Katkam wa pyntip u DHS, kiwa dang em ya u khñiang COVID-19 ha ki District man ki-ha East Khasi Hills 11 ngut wa kynthup ya ka wi ka kynthai, Ri-Bhoi 10 ngut wa kynthup ya 4 ngut ki kynthai, ha South West Garo Hills 2 ngut ki chynrang, ha East Jaiñtia Hills uwi u chynrang wa ha West Garo Hills 2 ngut ki chynrang.
Hawa pyntip chooh chooh, u Dr. War da ong u wa ki 4 ngut ha Ri-Bhoi kiwa naka Chnong 13 Mile toh kiwa ym em yatoh ki wa kiwa yoh COVID-19 ha Khanapara, deiwa pynrap leh wa ya kini haka 2 tarik uni u bani da chim yaki nongmuna wei hadien wa da yoh yaka Report da chem wa em ki ya u khñiang COVID-19. Da ong u wa ba uwi toh u wakreh Call Centre ha Assam uwa lai phah Test hi, wa uwi won wa chah sumaar ha Guwahati, ha katai ka Hospital da chim ya ki nongmuna wei da chem wa chah ktah ha u COVID-19, katwa uwi toh uwa lai synran chim dawai lang wei uwi won hadien wa da booddien ya ki bru wa yachem ki.
Da pyntip uwa ki 2 ngut kattæ da em ki hei chah sumaar ha Hospital wa em ha Guwahati, katwa ya kiwi won da kyrriah cha St. Paul Corona Care Centre kawa em ha Nongpoh. Da pyntip chooh chooh u wa heipor janmiet won da yoh yaka Report wa uwi naka chnong Khanapara-B da yoh lang u ya u COVID-19 wei toh uwa yajan wa kiwi kiwa chah ktah chwa.
U Dr. War da pyntip u leh wa ki 3 ngut ki chipai BSF wa yoh COVID-19 ha East Khasi Hills toh kiwa na Lyngkhat, wei ya kini da chem deiwa booddien ya ki bru wa yachem wa kiwi kiwa yoh chwa ya u khñiang napyrdi ki chipai. Hawa kylli u DHS da ong u wa hanla kini ki BSF toh kiwa chong ha Lyngkhat, tangwa ym em i chah ktah ya kiwa chong chnong neibhah ym em i yakhleh ha i lai i wan. Wei daw leh noh yaka Rapid Test ya waroh ki BSF kiwa em heini.
Ha iwi i liang u heh yong ka chnat i chait i khiah da pyntip u wa i leh ya ki Random Rapid Test da sdang ynne ka sngi na ka chnong Khanapara wei da ye wow Test hadooh 350 ngut ki bru wei waroh man ki kiwa man Negative.
