Ka Ministry of Jal Shakti da pyntip ko wa ka Northeast da em ko hadooh 1,640 tylli ki ujor wa yatoh wei pynemkaam bakla ya ka poisa wa i kreh habra ya ka Jal Jeevan Mission (JJM) iwa da ktah ya i rukom saam umkor ha ka thaaiñ.
Yeini da khana da u Minister of State ka Jal Shakti, u V. Somanna ha Rajya Sabha, heiwa ha waroh ka ri da em 17,036 tylli ki ujor na ki 32 jylla wa ki Union Territory. Kini ki ujor wan ki na ki khubor, kiwa mihkhmat, lyngba ka Grievance Portal, ki paidbah kamjooh na ka Suo-Motu Inspection.
Ha Uttar Pradesh toh wa boon dooh ki ujor wa kynjoh hadooh 84% na ki ujor ha ka ri heiwa ka Northeast leh tlot bha i pynkrehkaam ya ka.
Ha Assam samen da em 1,236 tylli ki ujor iwa boon dooh ha ka thaaiñ heiwa da pynchitom ya ki 17 ngut kiwa kreh sorkar, 4 ngut ki Contractor wa le ngut ki Third-Party Inspection Agencies (TPIAs).
Kini ki ujor kynthup ki nadooh i kreh habra hei rukom pyndait umkor, wym em u pyndep wow pynpoi umkor, i slem wow pynkrehkaam ya ka Scheme wei i pynemkaam bakla ya ka poisa.
Ha Tripura da em 376 tylli ki ujor, heiwa da pynchitom ya waroh ki 376 ngut ki Contractor.
Ka Manipur da sakhi ko 19 tylli ki ujor, wei da pynchitom ya ki 4 ngut kiwa kreh sorkar wa 39 ngut ki Contractor.
Ha Meghalaya da em 8 tylli ki ujor, wei da pynchitom ya ki 3 ngut. Ha Mizoram da em kawi ka ujor, katwa ha Arunachal Pradesh wa Sikkim ym em iwi wot leh i ujor.
Discussion about this post