Ka Coaching Camp kawa pynman haka 18 wa 19 tarik uni u bnai da ka East Jaiñtia District Cricket Association deiwa ya krehlang wa ka Meghalaya Cricket Association (MCA) da poi ko cha wakut ha madan wa em ha Dkhiah East Ladsutnga.
Kani ka Coaching Camp toh neibynta ki khynnah chynrang wa kynthai kiwa em hapoh 16 snem kiwa da em 82 ngut kiwa wan chimbynta.
Ha ka sngi pynkut da yoh yei klam wa tbian na u President ka Association u Rajiv Bareh uwa da pynsñiaw yei sñiawngooh ya ki Coach kiwa da wan na Shillong kiwa da em 3 ngut.
Da pynchlur u leh ya ki khynnah wa wan cha ka Coaching Camp wow man ki kiwa smat wa stiñ u chimbynta ha kiwon kiwon ki Tournament wa pynlai da ka District næ ki Association waphær waphær.
