U bru uwa na chnong Kundapur ka Karnataka uwa da chah pynyap ha Sharjah, UAE hadien wa wiar u ha u bnai July heiwa yei metyap u da chem wa chah ah i khynde lyngkhot, da wanrah noh yei metyap u cha India deiwa pynpoi chei chong tre u lyngba ka Mangaluru Airport ynne ka sngi hadien ar bnai.
Uni u bru toh uwa tip kam u Alwyn Prakash Kunder (50 snem) heiwa da wiar u nadooh ka 20 tarik u July dei wym em de yoh Phone oo katkam wa pyntip u payu u uwa tip kam u Anil.
U Alwyn toh uwa kreh wa kawi ka Private Airline kam u Senior Manager ha Sharjah Airport la 14 snem wei da im u ha Sharjah deilang ka kurim u kawa sikai skur wa u khon uwa lai Class-10 tangwa ya kini leh ym em chem ki.
Da sdang u payu u wow suba wa em wa jia iyi ræ iyi hadien wa yoh du ki Text Message tangwa manda Phone won ym em wa jubab.
Kamtæ u Anil da Phone u cha uwa tipmit u ha Sharjah uwa da lai chei thaw sah u Alwyn wa e da ka Company, tangwa u bru wa kreh Security ha kani ka thaw da ong u wa da lai liwan u Alwyn cha India.
Tangwa da phylla neibhah wa u Alwyn ym em liwan u cha India, kamtæ da lai pyntip cha ka Company wa kreh u wa da wiar u.
Ha ka 12 tarik u August ki pulit da chem ki yei metyap u Alwyn iwa da chah ah lyngkhot wei da thap ha ar tylli ki muna deiwa murieh hapoh bahen kawi ka kari kawa da ieh ha u sarok wa lai cha Oman. Neiliang ki bor ka aiñ da e ki ya ka Death Certificate cha ka yung u Alwyn ha ka 21 tarik uni u bnai.
Ha ini waroh ym em leh chem ya ka kurim wa u khon u Alwyn hadooh kattæ.
Discussion about this post