Kam chibynta i lehkmen yei lai luti ka jylla cha u moomær dap 50 snem, kamtæ ynne ka sngi ka Meghalaya Veterinary Service Association, Jaiñtia Hills Unit chirup i krehlang wa ka District A.H. & Veterinary Officer, West wa East Jaiñtia Hills District, Jowai/Khliehriat da pynman ki yaka Training Cum Workshop neibynta ki warep ha chnong Latyrke, East Jaiñtia Hills District.
U Dr. D.I. Kjam District AH & VO, West Jaiñtia Hills District uwa man leh u Chairman ka Meghalaya Veterinary Service Association Jaiñtia Hills Unit, hawa klam pdiang burom ong u i daw wa emkaam u pynman yaki pynsñiawthooh neipor cheipor toh neibhah wa ki bru hapoh ka jylla wym ye ki u im khlem baam yaki jait doh waphær waphær, katwa u pynmih won wym ye katkam i dawa yong i hi.
Ong u wa hadooh kamwa man kattæ yei emkaam doh dang chaniah beit i nabaar wei haka chisnem chisnem da ki phaw klur ka poisa da pynlut sepai neibynta u thied doh wei na ini i daw da pynman u sy’ad dor i doh.
Kamtæ kyntu u wa hawa i leh ye hi i u pynmih yei emkaam yong i hi, toh leh u chimkhia khnang yow ye u pyndap yei emkaam yong i da i hi.
U Dr. P.B. Nongpluh, District AH & VO, East Jaiñtia Hills Khliehriat ong u, i thmu u pynman ya kani ka e sikai toh yow pynmih yei doh, ki pylleiñ wa chiat wa khiah, yow tip kammon u yada naki jait kjut wa ktah yei dkhot i pran ki mrad, yow pynku yei ioh i la kiwa ri mrad, wei u nangpynbha chooh chooh ki yei kaam.
“Heiyatoh wa i bam doh sniang ha Meghalaya da khynjoh chaka 15,000 Metric Ton, kiwa pynmih won du kamwa 6,000 Metric Ton katwa kawa tam won da wanrah na baar,” ong u Dr. P.B. Nongpluh.
Ong haroh u wa iwa kongsan hi lada ye toh wow pyndap chwa yei emkaam ha chnong yong i hi leh da man i iwa myntoi.
Lyngba kani ka e sikai da yooluti u wa kiwa psan wa ri mrad u chim kabu ki wei kitu kiwa da em heini i kaam wow nang pynbha chooh chooh ki.
Neiliang u Dr. R. Pyrtuh BDO, Saipung leh kyntu u ya ki paidbah wow thooh yutip ki naki bru chemphang ha kani ka esikai lada em iwon iwon i artatien ki khnang yow ye ki u leh bha yei kaam.
Hadien wa yoh i klam tbian na kawi ka manbei warep, da yoh won yei kyntien e khublei won na u Dr. D. Tariang Assistant Secretary MVSA-JHDU.
