U Montri Rangbah ka jylla, u Conrad K Sangma da klam che u wa man ko iwa eh ya ka sorkar jylla wow pynhiar ya ka dan yong i Petrol wa Dielsel neibhah wa da em chwa i dooh nong kamwa T. 100 klur nei pynhiar ya ka dan cha ka 20% ini wa dep.
I ku dor yong i Petrol wa Diesel man-ka-sngi da pteiñ haka ri India waroh kawi, wei hapoh ka jylla Meghalaya kamwa da man hadooh ynne ka sngi 3 tarik, i dor yong i Petrol da man ko iwa palat T. 103-T. 105 chi liter aw jan waroh ki District ka jylla.
Hawa kylli ynne ka sngi, u Conrad da ong u wa kamwa dadep klam rap nachwa, ka sorkar Meghalaya toh kawa chim duna dooh i dan nei phñiang kari. Da ong u wa ha kiwi ki snem ka sorkar da jooh yoh ko wow pynlang dan palat T. 500 klur na ki Petrol Pump, tangwa neidaw wa pynhiar ya ka dan, ka sorkar katni da yoh dan ko du T. 400 klur wei ka dooh nong palat T.100 klur hawa nujor wa u snem wa da dep.
U Montri Rangbah da ong ym toh iwa suk ya ka sorkar wow chim rai wow pynduna chooh chooh ya ka dan, neibhah ka jylla da dep ko wow chim duna dooh tam ya ka dan, wei iwi wa ka sorkar hap ko wow booh hakhmat toh yeiwa boon i pynlut yong ka jylla. Tangwa da ong u wa ka sorkar hadooh katni dang bichaar ko kammon wow leh hajrong i ku dor i Petrol.
U Conrad da ong u leh wa ka sorkar jylla da pyrkhat ko wow yaklam leh wa ka sorkar India neibynta wow pynduna ya ka Central Excise Tax ha waroh kawi ka ri lada ye neibynta waroh kawi ka ri.
