Heiyatoh wa ka FIR wa da e da ka Teilang Suphuh ha Umpleng AD Camp heiyatoh wa i pyrchang u ksih yap u kurim ko ya u khon ko uwa dang le snem wei da maham u leh wow pynyap ka, da booh ya ka Case ha Khliehriat Police Station hapoh ka kyndon 352/323/506 ka IPC wei ya ka takit da leh da u USBI L. Kharsyntiew wei da Charge Sheet ha ka 11-09-19 pyrchah ya uni uwa chah pynbaad uwa tip kam u Morning War.
Hadien wa dep bichaar da ka yung bichaar u Chief Judicial Magistrate, East Jaiñtia Hills, da rai pynrem deiwa phah su kuna Rs. 500 hapoh ka kyndon 352 ka IPC wa Rs. 1000 hapoh ka kyndon 323 ka IPC.
Ha kawi won ka Case wa da e FIR da ka Lutmon Dkhar heiyatoh wa i chah dat chah pynchitom wei chah pyntieñ ha u kurim wa da yalait ko uwa tip kam u Bun Phawa, da pynman takit da ka Khliehriat Women Police Station iwa da leh da ka WPI O. Tyngkan heiwa da Charge Sheet ha ka 03-09-19.
Hadien wa pyndep yei bichaar da ka yung bichaar u Chief Judicial Magistrate, da rai pynrem ya u Bun Phawa deiwa phah kset 3 snem deilang ka kuna wa Rs. 30,000 hapoh ka kyndon 498 A ka IPC, najrong kani da phah leh wow kset 5 snem deilang ka kuna wa Rs. 20,000 hapoh ka Section 506 ka IPC wa sa chi snem won hapoh ka kyndon 323 ka IPC.
Heiyatoh won wa i kaam yachoh heiwa u Neini Bareh da chah dat u ha u Sanki Lamurong ha ka 30-09-19 kawa da booh Case ha Khliehriat Police Station wei da takit da u USBI L. Kharsyntiew heiwa da Charge Sheet ha ka 07-01-20.
Hadien wa pyndep yei bichaar da ka yung bichaar u Chief Judicial Magistrate, da rai pynrem ya u Sanki Lamurong deiwa phah su ka kuna wa Rs. 400 hapoh ka kyndon 352 ka IPC wa Rs. 900 hapoh ka kyndon 323 ka IPC.
Discussion about this post