Kiwa thap Vote ha ki 7 tylli ki Constituency ka East wa West Jaiñtia Hills hadien wa dapoi lut ka yukheiñ i thap Vote neibynta kani ka Election MLA 2023, da mih ki deiwa boon wei deiwa kheiñlang dapoi 90% i wan mih ki wow pynemkaam yei hok yong ki.
Na ki 7 tylli, ha ki 5 tylli ki Constituency da tam 90% kiwa thap Vote kiwa boon dooh ha Mowkaiaw Constituency (92.73%), ka Amlarem Constituency (90.97%), ka Sutnga Saipung Constituency (90.80%), Khliehriat Constituency (90.75%) waka Nartiang Constituency (90.49%).
Ki ar tylli ki Constituency ki wym em poi cha ka 90% toh ka Raliang Constituency (88.56%) waka Jowai Constituency (85.95%).
Ka Mowkaiaw (92.73%) toh kawa heh dooh i mih kiwa thap Vote hapoh ka jylla wei da pyndood hei wa ar da ka 47-Rajabala Constituency (92.66%) wei hei wa le won ka 48-Selsella (91.71%).
Waroh ki Constituency kiwa dapoi 90% kiwa thap Vote da em ki 11 tylli iwa mut awjan chiteiñ toh ki Constituency kiwa napoh Ri-loom Jaiñtia.
Kiwa duna dooh i mih kiwa thap Vote toh ha ki Constituency wa em ha sor Shillong ki wym poi tang 70% kiwa kynthup ya ka 16-East Shillong Constituency (64.69%), 17- North Shillong (64.76%), 18-West Shillong (67.38%), 19-South Shillong (62.10%) wa ha 21-Nongthymmai (66.58%).
Ki ar tylli ki Constituency wa em ha sor Tura leh toh kiwa duna i mih kiwa thap Vote kitæ ka 50-North Tura (75.98%) waka South Tura (73.65%)
Ha waroh ka jylla, ki chynrang wa wan thap Vote da em ki 8,82,330 ngut katwa ki kynthai 9,42,416 ngut wei da em leh ki 2 ngut ki wym em jied kam ki kynthai lane chynrang. Kamtæ waroh kiwa thap Vote da em ki 18,24,748 na ki 21,40,453 ngut iwa dapoi 85.25%.
