Ka District Disability Rehabilitation Centre, Jowai chirup wa ka yung krehkaam u Deputy Commissioner, East Jaiñtia Hills District, Khliehriat wa ka District Social Welfare Officer, East Jaiñtia Hills District ynne ka sngi da pynman ki ya ka Mega Mela Assessment Camp for Persons with Disability ha pchem ka yung krehkaam u Deputy Commissioners Office, East Jaiñtia Hills District, Khliehriat neibynta ki bru wa em i duna hei doh i pran.
Ha kani ka sngi u F. Bareh, MDC, Khliehriat–Rymbai Constituency da man u kam u kongsan hei emlang u S.S. Syiemlieh, Addl. Deputy Commissioner, ka R. Passah, District Social Welfare Officer, ka Dr. A. Paswet, Psychiatrist, Ialong Civil Hospital, Jowai, u Dr. P. Pyrtuh, District Nodal Officer, DRC, Ialong Civil Hospital, Jowai wa kiwi kiwi.
U F. Bareh, da ban joor u ya ki paidbah wow chim ya i tika yada COVID-19 deiwa kyntu ya ki paidbah wow pynchlur wei wow pynsñiawthooh ya kiwi hajrong i myntoi wow chim tika.
Da e khublei u leh ya ka District Disability Rehabilitation Centre, Jowai, District Administration wa ka District Social Welfare Officer, East Jaiñtia Hills District wa pynman ko ya kani ka Mega Mela Assessment Camp for Persons With Disabilities (PWDs) wow pynche, pynsñiawthooh ya ki PWD wow wan chaphrang wow yoh myntoi na ki Scheme wa ki yarap wa e ka sorkar.
U S.S. Syiemlieh, da ban u hajrong i emkaam u Aadhaar deiwa kyntu ya kiwa hayung ki PWDs wow pynpsiah ya i pyrtuid kamjooh yong ki khon kiwa da dap 5 snem tam khnang wow ye ki u yoh yarap na ki chnat sorkar.
Neiliang u Dr. P. Pyrtuh, hawa e ya ki kyntien waiphang da ong u wa i daw wa pynman ya kani ka Camp toh kam chibynta wow ye leh i e ya ka Disability Certificate, Aadhaar Card kamjooh wow chim tika yada COVID-19.
Da ong u wa katkam ka PWD Act 2016 da em 21 jait ki rukom duna ha i doh i pran (Disabilities) wei katkam ki kyndon kani ka aiñ, ki bru wa em i duna palat 40% ye ki wow yoh ya ka Unique Disability ID (UDID card)/Disability Certificate. Da khana u leh wa kammon wei kiyi de ki kot wa emkaam wow yoh ya ka Disability Certificate.
Ha kani ka Mega Mela Assessment Camp, da em 243 ngut kiwa da chimbynta, 94 ngut ki PWD wa da yoh ki ya ka Unique Disability ID (UDID Card)/Disability Certificate.
Da em leh 21 ngut kiwa da yaleh ya ka CM Scheme, 5 ngut kiwa yoh tika COVID-19 wa 39 ngut kiwa da yaleh Aadhaar Card.