Shillong: Ka sorkar jylla ynne ka sngi da klam che ko wa i wanrah ya ki wakreh na baar jylla, u man bait thij du ya kitu ki kaam wa ki tre jylla ym ye ki wow leh næ ki Highly Skilled ym toh ya kiwi won kiwa mylla, wei ki seiñbhalang ym toh u sñiawthooh bakla ki.
Kam wow pynkynmoo wa da mih i pyrchaah na kiwa boon ki seiñbhalang kiwa em ha ka jylla hajrong ini i rai yong ka sorkar wow wanrah ya ki wakreh na kiwi ki jylla.
Hawa klam ynne ka sngi, u Symbood Montri Rangbah, u Prestone Tynsong da ong u wa ka sorkar sñiawthooh ko yei sñiawkhia yong ki seiñbhalang wow yada yaka jylla na u khñiang kjut COVID-19, tangwa da ong u wa ka sorkar da chim ko ya ini i rai neibhah wa em ki kaam waki ki trai jylla ym pu ye ki wow leh wow kreh, wei ini i wanrah da kiwa na baar u man ko thij ya kitæ ki jait kaam.
Da ong u wa ka sorkar ym banse ko wow khut da ki bru kiwa na baar neibhah wa em ki kaam wa hap wow pyndep wa da lai i kreh, deiwa pynrap leh wa em ki kreh wa ym ye u yang hadooh chi snem ar snem wow pyndep.
U Montri da kyntu u leh yaki seiñbhalang wow sñiawbha ki wym toh u sñiawthooh bakla ya ini i rai yong ka sorkar, neibhah waka sorkar ym yohsa ko wow chim ya ini i rai deiwa sñiawkhia yei long i man haka jylla.
Da ong chooh chooh u wa ka sorkar da booh ko leh ya ki kyndon wow pynrkhiñ neibynta kitu ki wakreh wa wan na baar jylla, deilang wa pynbiang ki yaki kot ki sla.
Discussion about this post