Shillong: U Montri wa pait yaka chnat Revenue and Disaster Management ka jylla, u Kyrmen Shylla da pyntip u wa nadooh ka 24 tarik u bnai wa da dep hadooh ynne ka 2 tarik da em hadooh 756 tylli ki manyung kiwa chah tympra ha i bor ka rymaw, katwa kiwa chong chnong kiwa da chah ktah em ki 5,27,343 ngut, ki chnong wa chah man ki 194 tylli, katwa ki mynsien wa da dooh noh da em ki 3 ngut.
Hawa kylli ya i doohnong na ini waroh, u Montri da ong u wa hadooh kattæ ka chnat dang yang ko yaka bui (Report) na ki Deputy Commissioner yong waroh ki District, tangwa da pyntip u wa katkam ki kyndon ka chnat daw hap wow su bai lutsan T.4 lak cha kiwa hayung yong kiwa da khlaad na i chah ktah ha i bor ka rymaw.
U Kyrmen Shylla da pyntip u leh wa haka 24 tarik wa da dep, da em leh i chah tympra 14 tylli ki thaw rep wei kamjooh ki sarok wa da chna lyngba ka PMGSY, wei ka chnat da phah ko leh ya ki bor pynlai District wow lai pait yaki thaw rep yow phah won ki yaka Report.
Da ong u wa hadooh kattæ ym pu tip kiyi ki District kiwa chah ktah boon, tangwa da pyntip u wa boon ki thaw wa chah ktah kynthup ki yaka Jaiñtia Hills kawa ha ki por wa nachwa ym em da chah ktah ware ko, ki bynta yong ka Khasi Hills waka Garo Hills kawa jooh em yei chlai um ha ki por lyiur.
Hawa kylli chooh chooh hajrong i slem ki chnat wow lai pait wow chim yukheiñ, u Shylla da ong u wa neiliang ki sahep da pyrchang ki wow pynsmat, tangwa neidaw wa em ki bynta wa hap wow pait hadooh arsien lesien khnang wow lai ryngkat wa ki kyndon wa da booh hachwa wow e yaki yarap.
Discussion about this post