Shillong: Ka sorkar jylla ynne ka sngi da maham ko ya kitu kiwa chong chnong kiwa hap pyndep ya ka Quarantine wow mih ki cha ki thaw paidbah, wei lada ka sorkar yoh yutip ko, daw pynchitom ya ki katkam ki kyndon aiñ deiwa eh.
Kam wow kdaw heini wa rap nachwa da em hadooh 400 ngut kiwa tyngkheiñ ya ka Quarantine wa da phah da ka chnat i chait i khiah ha Shillong, wei da yoh yutip leh wa katni wa dang em boon kiwa chim stiñ wei pynkheiñ yaki kyndon wa da phah da ka sorkar, heiwa ki bru kiwa dang em ha i por Quarantine da mih ki cha ki thaw paidbah, iwa da pynman leh yaki paidbah wow chrai yei chah wow liwan kiwa sahkut cha baar jylla.
Hawa kylli hajrong ini, u Symbood Myntri Rangbah ka jylla, u Prestone Tynsong da maham joor u ya kitu kiwa pynkheiñ ya ka Quarantine deiwa ong wa ini toh i sien wa khaddooh wow maham, wei lada dang em kiwa yaleh pyrchah næ pynkheiñ ya ki kyndon, ka sorkar ym yohsa ko wow pynchitom katkam ki kyndon aiñ.
Da ong u wa kani ym toh ka tamasa deiwa kyntu leh wa kitu kiwa toh u pyndep yaka Quarantine wa toh u burom wei wow em i kitkhlieh, neibhah waroh tieñ wa lada e laad ya ki khynroo khyllood wa kiwa chong chnong kiwa sahkut cha baar jylla wow liwan, nadooh ka sorkar, ki bor pynlai chnong wot kiwa ha yung yoh wa kini wanrah ki ya u khñiang kjut.
Discussion about this post