Jowai: Hadien wa mih ka khubor hajrong i pynemkaam bakla uwi u bru wa tip kam u Tonu Dey (Gaurav) wa man u kam uwa ebuit (Adviser) yong ki ar tylli ki District Council da mih chiboon i beiñ wei dawa na kiwa boon wow pyndam wei wow pynche hajrong i rukom thung kreh ya oo.
Ynne ka sngi, u Winning G Sungoh EM ka Trade da pynche u deiwa ong wa mar ya tip yeini da yachem ka Executive Committee ynne ka sngi wei ka Council ym em u thung ko ya kam uni u bru wow man kam u Financial Adviser ka Council wei ka Council leh ym tip ko ya oo.
Da pyntip u wa da yoh u yaklam wa u Tonu da pynche u wa da yarap u ya ka JHADC ha ki snem 2018 ha nongbah New Delhi heiyatoh wa ki kaam poisa ka Council wa ka sorkar pyrdi wei ya oo da thung da ka EC warim ymtoh da kani kawa katni.
U Tonu da pynemkaam bakla u ya i pyrtuid ka Council kamjooh leh ya ka chaap ka sorkar (emblem) ha ka Visiting Card ka yong oo.
U Winning da kyntu u leh ya ki paidbah ka Ri-loom Jaiñtia wa ymtoh u sñiawthooh bakla ki yeini neibhah ka Council ym em u thung bru ko da u baar jylla wei ki kaam poisa poilaiñ ka Council leh da pait bait da u CEM uwa man leh u Incharge yong kani ka chnat.
Da pyntip u leh wa neiliang u Tonu da phah u leh ya ka chithi paan maap cha u CEM ka Council wei da kular u leh wow dam noh u pynemkaam bakla ya ka Visiting Card yong oo.
Heiyatoh wa iyi wow leh ka Council neini hajrong uni u bru, u Winning da pyntip u wa hadooh ynne ympu em chim rai tangwa ha kini ki sngi wow wan daw chong yalang ka EC wow pyrkhat iyi wow leh ko ya uni u bru.
