Ynne ka sngi da pynman ya ka Dorbar Tlang ka JHADC heiwa u MDC ka VPP na War Central da kylli u katwon tylli ki Check Gate ka Forest Department wa krehkaam katni, heiwa u EM wa pait ya ka Forest u Hambertus Nongtdu da jubab u wa em 7 tylli kini ki Check Gate.
Da pyntip u leh wa kini ki Check Gate kynthup ki ya ka Ratacherra, Sonapur, Nookyndur, Lumkya, Iawthymme, Bamkamar wa Nongtalang heiwa san tylli kini toh kiwa pynlai da u bru samen, u S. Tang katwa 2 tylli won kiwa pynlai hi ka Council.
Hajrong ini i Jamshaphrang da kylli u yei yoh myntoi lada boon manda pynlai da ki bru næ da ka Council, yeiwa u Hambertus da ong u wa rap boon i myntoi toh da ka Council hi.
U Jamshaphrang da khyrngiat u leh wow yoo wa lada boon i myntoi toh deiwa pynlai hi ka Council kammon won da pynlai ya hadooh san tylli ki Check Gate da u jooh u bru, yeiwa u Hambertus da ong u wa yeini da leh da ka Executive Committee kawa rim wei yoosar heitu i por wa lilam da heh dor dooh da u jooh donhi u bru.
Neiliang uwa yahkhmat ka Liang Pyrchah, u Andrew Shullai da kylli u lada em i rai næ ka kyndon aiñ wow booh ya ka Check Gate ha Bamkamar wa Nongtalang wei lada em i yohbor wow khrong na ki truck hadooh Rs. 300 kam ka Fund neibynta ka Pollution wa Environment, yeiwa u Hambertus da jubab u wa kani ka Fund toh kawa da rai lang wa ki Exporter na ka thaaiñ heiwa em ki kari leh kiwa su du Rs. 100 kawi.
Heiyatoh wa kini waroh, u Jamshaphrang da kyntu u ya ka Council wow leh yeiwa emkaam khnang wow myntoi ko ha waroh ki liang.





Discussion about this post