Shillong: U Symbood Montri Rangbah ka jylla, u Prestone Tynsong da ong u wa ka sorkar næ ka chnat i chait i khiah ym ye ko wow booddien man ka minit ya waroh ki bru, tangwa iwa emkaam kattæ toh wow em i kitkhlieh samen samen yow lait na i maa chah ktah ha u COVID- 19 wei wow yada ya idæ.
Hawa kylli, u montri da pyntip u wa u pyrsa kurim yong uwa da heh bru wa yoh COVID-19 na Ri-Bhoi, toh uwa liwan na baar jylla nadooh ka 26 tarik yong u bnai wa da dep, neidaw wa toh uwa yah kari wa kit tiar wa emkaam, deiwa pynrap wa kani man ko kam i kyrsu yaka sorkar wow pynkhyrngiat bru wa ym toh u kheiñ stiñ wei uni u pyrsa kurim leh ym em yoh u ya u COVID-19 hadien wa dep Test.
Rap nachwa ka sorkar da kyntu ko yaki dorbar chnong wa ym toh u khang ya kiwa yah truck wa lai kit yaki marbaam, næ ki mar kiwa emkaam jhan na kiwi ki jylla wow lai liwan ki cha yung neibhah yaki da phah deiwa tip yong ka sorkar wei da pyndep lut yaki kyndon kamwa da phah da ka chnat i chait i khiah.
Ha iwi i liang da pyntip wa ka chnat i chait i khiah yong ka jylla da dep yoh ki yaka Report yong ki 43 ngut kiwa yachem wa uni wa yoh COVID-19 ha Ri-Bhoi District, wei ya kini waroh da chem wa ym em chah ktah (Negative) ki, tangwa neiliang ka sorkar da booh ko yaki ha ki Quarantine Centre yow pait yaki.
U Symbood Montri Rangbah da ong u wa ka chnat kattæ dang booddien chooh ko ya em ki bru kiwa yachem wa uni u bru uwa chah sumaar kattæ ha Dr. H Gordon Robert Hospital, Shillong. Da pyntip u leh wa ka sorkar da booh ko yaki ki 43 ngut kiwa ye u chah ktah wa kiwa rap em hei maa ha ki thawa wa da booh kyrpang hanla da dep wow Test ya ki, dewi pynrap wa ym ye wow kheiñstiñ ya mih hadien 4-5 sngi ki dak ki chin.
