Shillong: Ki le ngut ki MLA wa kynthup ya u Renikton L Tongkhar yong ka Mawkyrwat, u Himalaya M Shangpliang yong ka Mawsynram wa u Pius Marwein MLA ka Ranikor, ynne ka sngi da ya phyllu yumut ki wa ki dkhot ka KSU South West Khasi Hills District hajrong i psiah ki bru wa na baar chapoh ka District.
Hawa klam hadien ka yalang, u Renikton da ong u wa kam uwa mihkhmta daw rah ya i pynsñiaw yong ki dkhot ka KSU cha ka sorkar, khamtam kat wym pu chah ya ki wakreh na baar jylla wow wan kreh yaki kaam, wei wow e laad chwa yaki khynroo, ki tre jylla kiwa liwan, yow yada yaka District wei kamjooh yaka jylla na i maa ka khlam COVID-19.
Da ong u wa lada man iwa ye wa yaki kaam kiwa dang ye, ka sorkar ym toh u chah ko yaki bru kiwa na baar wow psiah chapoh ka District.
Ha i jooh i por da yaroh u leh yaka Company chna sarok, ka NHIDCL kawa da chim yaka rai wow e sikai wa kyrpang yaki khynroo ka thaaiñ hawa yatoh wa ki kaam ki jaam khnang wa ki bru yong ka District u yoh ki ya i myntoi, deiwa pyntip wa ka NHIDCL da tyrwa leh wow su yaka Stipend T.15000 ya kitu kiwa chah jied wow lai chah hikai kyrpang.
Da ong u wa daw kyntu ya kiwa pynlai ka NHIDCL wow kynthup rap boon yaki khynroo ka thaaiñ ha kani ka chah hikai deiwa pynhiar noh kajiak yaka Stipend khnang wow yoh myntoi rap boon, wei ha i jooh i por da ong wa daw yaklam wa katai ka Company wow pynman yaka hikai hapoh kani ka jylla neibhah wa du neibynta ki kaam kiwa khian wa ym yahap wow e sikai chadooh Assam.
Ka NHIDCL ka em ko ar tylli ki kaam wa kreh ko kiwa heh kiwa katni hapoh South West Khasi Hills District, kawi ka sarok na Ranikor cha Baghmara wa kawi na Lad Mawreng-Mawphalng cha Ranikor.
Neiliang u MLA ka Mawsynram, u Himalaya Shangpliang da ong u wa i sñiawkhia yong ki dkhot ka KSU toh hajrong i thmu yong ka sorkar wow wanrah ya kitæ ki ‘Highly Skilled’ na baar jylla, deiwa pynrap wa kam u MLA da dep u wow kyntu yaka sorkar wow thooh chwa da ki khynroo kani ka jylla wei wow hikai yaki. U Shangpliang da ong u leh waka sorkar ya kitu ki kaam ki wym toh kiwa jhan toh u pynsangeh chwa chipor, katwa ya kiwa emkaam wow kreh toh u pynrkhiñ wei wow bood yaki kyndon wa da phah da ka chnat i chait i khiah.
Katwa neiliang u Pius Marwein da ong u wa ki dkhot yong ka KSU da pynsñiaw ki yei sñiawkhia yaka jylla, wei i pyrchah toh wow yada yaka jylla waka thaaiñ naka khlam COVID-19.
Hawa yaklam wa u President ka KSU-SWK, u Forwardman Nongrem da ong wa ka seiñ pteiñ bait ko wow pyrchah ya i psiah ki baar jylla ha i pyrtuid ki wakreh ‘Highly Skilled’, deiwa pyntip wa ka seiñ da klam che wa katni ym ye wow pdiang wow kreh ki baar jylla khamtam ha ki kaam ki wym man kiwa jhan.
Da ong u wa ka seiñ ka yieñ bait ko wow pyrchah toh neidaw wa lada e laad yaki baar jylla wow wan kreh daw em i maa ha i chait i khiah yaki paidbah neibhah wa haka thaaiñ SWK, tlot bha ki thaw e sumaar, wei iwa ka seiñ kwah ko katni toh yow lait naka khlam COVID-19.
Chooh chooh da ong u wa ka seiñ ym kut du hei yaklam, tangwa daw leh ya i bynta wa ym e laad wow wan ki bru na baar, neibhah ka seiñ ym kwah ko wa ka yungkrehkaam ki Deputy Commissioner u man ki ki thaw wow pdiang sñiawbha ya ki baar jylla.
