Jowai: Ynne ka sngi ki paidbah dei mynsien wa khia wei yatylli da mih yonglang ki wow yarap ya ki mynyung ki ar ngut chi payu kiwa da chah ktah ha i diñ ynnin i step synyaaw ka 20 tarik ha Tuber Kmaichnong, East Jaiñtia Hills.
Ki paidbah da wan ki na ka chnong Tuber Kmaichnong, ki chnong wa marjan wa kamjooh leh na Nongbah, West Jaiñtia Hills.
Ki paidbah da mih ki wow pynkhooid ya ki yurim yong kini ki yung wei da chna ki da ki yung dara wa chipor wow pynemkaam ki dkhot kini ki manyung wei da yoh yarap leh na u montri ka sorkar jylla uwa man leh u MLA ka thaaiñ, u Kyrmen Shylla uwa da e yarap hadooh ynru ban ki tin yung cha kini ki manyung.
Kam wow pynkynmoo heini, kini ki yung wa da chah baam lut ha i diñ ynnin i step ha Moowatam, Tuber Kmaichnong toh ki yong ka Diamondful Sana wa ka Beautiful Sana.
Ini i mynsien yatylli wei mynsien wyrai ki paidbah da man i leh kam ka nongmuna ya ki paidbah kiwi ki chnong wow yarap kylliang hawa chem ya iwon iwon i jia wa sñiawsih.
