Ka JSM Thadlaskein Block Circle da saam khoo ko ha chnong Mookyndur ynnin ka sngi haka yalang wa pynlai da u Waheh Chnong ka Mookyndur u Everist Pariat uwa da ong wa kmen mynsien u hawa wan ka JSM cha ka chnong wow e yarap cha ka chnong.
U President ka Circle u Suni Bareh da ong u wa daw pait chooh cha ki chnong nongkyndong wow yarap yaki katwa ye i bor ka seiñ, khamtam ha kini ki por wa kyrdooh kiwa chong chnong.
“Neiliang ka JSM da kular ko wow pdiang ya kiwon kiwon kiwa kyrdooh næ kiwa emkaam yarap wow wan ki chakhmat yow yoh yarap yeiwa duna ki paidbah wa chong chnong”, da ong u President.
Ka JSM ynnin ka sngi da pynkha ko leh sa kawi ka chnat krehkaam wa tip kam ka JSM-Barato Zone.
Ha kani ka sngi da emlang kiwa yahkhmat ka seiñ nadooh u President Rangbah ka seiñ u L.S. Rymbai, u Vice President u Skhembhalang Dkhar, u President ka Eastern Region u Shnalad Rymbai, u President ka Thadlaskein Circle u Sunida Bareh, ka President ka Women’s Wing ka Bythygrace Dkhar wa kiwi kiwi de.
U L.S. Rymbai da ong u wa kani ka chnat krehkaam wa thymme man ko kawa emkaam bha hadooh kattæ kattæ hapoh kani ka thaaiñ neibhah ki chnong wa em cha kani ka thaaiñ toh kiwa em khappood waka Assam wei boonsien leh jooh em ka ya kajia wei chah pyndik ha ki bor pulit ka Assam.
Chooh chooh kani ka thaaiñ da jooh dawa ko yaki Pulit Outpost tangwa hadooh ynne ka sorkar Meghalaya ym em chimkhia ko. Kamtæ ka JSM lyngba kani ka chnat daw yaleh ko wow pynbor yaka sorkar u booh ko yaka Police Outpost khnang wow suk ki paidbah.
Kiwa kitkam wa ki dkhot man ki kamni hawah:
President u Nishwa Dkhar, Secretary u Pynslemmi I Paslein, Assistant Secretary u Tomansuk Lamare, Education Secretary u Heingait I Sten, Publicity Secretary ka Odashngain Lytan, Organising Secretary ka Pynibha Lytan, Financial Secretary ka Shebamon Pala wei ya kiwi ki kaam da ekti ha kiwa yahkhmat wow leh ki katkam i sñiawthooh yong ki. Kamjooh waroh kiwa ym em mih pyrtuid toh ki dkhot wa pura kani ka chnat.
