Shillong: U Chief Executive Member (CEM) ka Khasi Hills Autonomous District Council, u Titosstarwell Chyne da kyntu u ya waroh ki chnong kiwa em ha khappood wa lada kwah ki wow yada ya ki thaw yong ki, toh u chong suk chwa para ki, neibhah lada ym ye, ka Assam daw chim kabu ko lada yoo ko wa ki chnong ya chruit ki.
U CEM da ong u ya ini hawa jubab hajrong i yatai wa da wanrah da u MDC ka Rambrai-Jyrngam yaki luti wa ka KHADC da chim ko neibynta kiwa chong chnong ha ki khappood waka Assam.
Da ong u wa ka Executive Committee ka sñiawkhia ko ya i eh wa yachem kiwa chong chnong ha ki khappood, tangwa i bor wa boon toh ha ki kiwa synchaar chnong wow yakhun pyrchah ya i eh ha khappood. Da ong wa i eh ha khappood mih ki leh na kiwa synchaar chnong, deiwa e ki yaka NoC cha ka Assam wow kreh ya i kaam.
U Titos da kyntu u leh yaki paidbah wa ym toh wow baam ar maloi, neibhah wa yoh yutip wa em kiwa chong chnong kiwa em 2 tylli ki EPIC wa Ration Card, kawi na Meghalaya wa kawi naka jylla Assam wei ini daw warah ko yei eh chooh chooh.
Da ong u leh wa i wan yong u COVID-19, ha iwi i liang da pynyohnong neibhah kiwa boon ki chnong da booh yaki khyrdop wow yada nei poor yong ka khlam, deiwa pynrap leh, kamwa yada kattæ na ka khlam, lada ye wow pteiñ, daw man ko i yada leh yaka khappood.
Chwa ya ini, hawa wanrah ya ka phang yatai, u MDC ka Rambrai, u Bajop Pyngrope da ong u wa i eh yong ki paidbah ha khappood nang joor katwa nang mih ki sngi neibhah wa ki thaw khappood da chah ieh khonswet ha ka sorkar jylla, katwa ka Assam da leh ko boon ki kaam pynroi, wei ini da pynman yaki paidbah wow kyruiñ cha Assam wow yoh ya ki Scheme wot wow chim EPIC na Assam.
Da ong u wa yaka Langpih da boon snem da pynman du kam ka kaam Politics, wei du hadien wa chah siat yap 4 ngut, katai ka chnong da yoh ko yaka sarok, wei i dawa yaka Police Outpost leh hadooh katni ym pu man ko.
Hawa chimbynta lang ha kani ka yatai, u MDC ka Mawkhar-Pynthorumkhrah, u PN Syiem da ong u wa i wym pynlai yumut ka sorkar jylla toh iwi naki daw wa yachem chitom ki chnong wa ha khappood, tangwa ka Assam da theh ko yaki Scheme pynroi. Da ong u wa ka District Council toh wow tuklar wei ka EC tow wow kyruiñ kyrpang ko cha ki.
U Gabriel Wahlang uwa man u MDC ka Nongstoin da ong u wa emkaam wow chna yaki yaw wow yarap yaki chnong wow yada chah kam ki thaw ha ki khappood.
U Ronnie V Lyngdoh, MDC ka Mylliem da ong u katwa ym pu ye wow pynbait ya u pood u ang, toh wow leh kiwon kiwon ki kaam wow pynsah naam ya kitu ki thaw deiwa ya krehlang wa ki Hima wow chna yaki skur, wow leh ya ki Plantation neibhah ym ye wow suki hi-eh ya chah pynbaad wa ki MDC leh emkti lang ki.
