15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Yoh kem ki pulit ya ki dkhot ka GNLA kiwa rah yabor ya uwi yow dawa poisa

Advertisement ad1
Advertisement ad1
Advertisement ad1

Ki pulit ka West Garo Hills da yoh kem ki yaki damok wa kynthup yaki dkhot warim ka Garo National Liberation Army (GNLA), hadien wa rah yabor ki ya uwi wa yah kari Pickup ha kani ka 23 tarik.

Ki pulit da pyntip ki wa na ki 7 ngut kiwa yoh kem, kiwa boon toh kiwa naka GNLA.

Katkam wa pyntip ki pulit wa uwa yah kari uwa chah rah bor uwa man leh u tre kari Mahindra Pickup toh uwa naka chnong Romba Adingre kawa haap hapoh ka West Garo Hills.

Uni uwa yah kari da chah rah u heipor wa liwan u na East Garo Hills wei da suba wa da pynlait ya oo hadien wa su poisa pyn haka sngi wa bood ka 24 tarik.

Yei thooh wow kem ya kini da pait da u Superintendent of Police deiwa krehlang u CI-Sadar PS, Tura OC, u In-charge ka Chandmari Beat House, u In-Charge ka Rongram OP wei da yahkhmat yaki pulit da u DSP (Headquarter).

“Katkam wa tip i, ya uwa chah rah, da pynlait haka janmiet ka 24 tarik hadien wa su poisa. U CI Operations da pynjoor u wow thooh ya kini wei i krehchitom da yah ko cheiwa yoh kem kini ki 7 ngut,” da ong u SP, WGH, Dr. MGR Kumar.

Kini kiwa chah kem da yah ki leh yow chem yaki tiar yasait kam ka Carbine, 3 tylli ki 7.6mm Pistol wa chna ha China, 4 tylli ki tadong kuli (Magazine), 2 tylli ki Grenade, ki kuli, 2 tylli ki Mobile Phone deilang waka poisa wa su (Ransom Money) wa T. 3,26,500 wa da yoh kini kiwa chah kem.

“E khublei i yaki 2 ngut kiwa yarap kiwa na Donsimgre Rombagre, kiwa pyntip ya ini wa jia. Ka takit dang lai ko chakhmat wei ya kiwa chah kem da phah cha yung kachari. Wei yaka Case da leh haka Tura PS,” da ong chooh chooh u SP.

Kiwa chah kem da tip kam u Probitdro A Sangma (35) uwa na Rombagre, u Dipit Ch Marak (30) uwa na Najing Bazaar, Tura, u Pillington Ch Marak uwa khut sin kam u Rakcheng uwa na Chiading, EGH, u Dunia K Sangma (30) uwa na Upper Babupara, Tura, u Prewin R Sangma (35) uwa khut sin leh kam u Walnang uwa na Chokpot, SGH, u Rakseng Ch Marak (33) uwa khut sin kam u Geloram, uwa na Rongsak, Williamnagar, EGH wa u Bandi Ch Sangma na Asibra, Tura.

Na kini kiwa chah kem, kiwa boon toh ki dkhot ka GNLA kiwa da wan pyndem.

Share this:
Previous

Ki chnong khappood ym toh u ya chruit ki yow lait ka Assam u chim kabu: CEM

Next

U pteiñ biang ka NPP wow kyrchaan yaka sorkar wa yahkhmat daka BJP ha Manipur