Ka National People’s Party (NPP) da rai ko wow kyrchaan biang yaka sorkar synrop ha Manipur wa yahkhmat daka BJP hadien wa yaklam wa u BJP National President u JP Nadda wa u Union Home Minister u Amit Shah.
U heh ka NPP u Conrad K Sangma, da poi u ynne ha Imphal hadien wa liwan na Delhi deilang wa u Convener ka NEDA u Himanta Biswa Sharma deilang waki MLA ka NPP na Manipur, kiwa da pyntip ya ini i rai yong ka NPP wow psiah biang chapoh ka sorkar wa yahkhmat daka BJP. Deiwa pyntip leh wa ki MLA ka NPP daw man biang ki kam ki montri tangwa yaki kaam wa ksoh ki daw pynkylla.
Hanla ya i rai ka NPP wow psiah biang cha ka BJP da wan i hadien i yachem wa kiwa yahkhmat ka BJP ha Delhi kiwa da kular wow leh ya iwa emkaam ya i waroh wa sñiaw thut ki, u Conrad da ong u wa ka Party da rai ko wow kyrchaan biang yaka BJP deiwa pyrkhat yaka jylla Manipur wei wow wanrah biang yei bha i miat ka kaam synchaar khadar hapoh ka jylla.
Ki 4 ngut ki MLA ka NPP da dam ki wow kyrchaan yaka sorkar haka 17 tarik deilang wa ki 3 ngut ki MLA ka BJP wa uwi naka AITC, u MLA samen yow chan yaka Secular Progressive Front wa yahkhmat ka Congress.
Ynne da lai yachem ki leh yaka Lat ka Manipur wa yahkhmat da u Conrad Sangma wa u Himanta Biswa Sarma yow pyntip cha ka deiwa e leh yaka chithi wa pynyoo wa kyrchaan ki yaka sorkar wa yahkhmat daka BJP ha Manipur.
Heiyatoh won waka SPF, u Conrad da ong u wa da mih naka wei yeini leh da lai pyntip cha ka Lat wa da emlang biang waka sorkar wa yahkhmat daka BJP.
