Ynne ka sngi kawa man ka sngi lynkhooh snem wa 21 snem wa khlaad uwi na ki khon ka jylla hei yakhun ha ka thma Kargil, u Capt. Keishing Clifford Nongrum, neiliang kiwa yahkhmat ka seiñ ABVP, Meghalaya lyngba ka Darilin Tang kawa man ka State Secretary ka seiñ chirup wa ki dkhot hei emlang u H. Thabah uwa man u In-charge ka Police Beat House, Rilbong da pynman ki yei kynmoo warom ya uni u khlawait ka ri.
Ya ini i kynmoo warom da pynman ha Rilbong, Shillong, deiwa bood ryntih ya ki kyndon ka sorkar wow yada na u Khlam COVID-19.
Kam wow pynkynmoo heini, u Captain Keishing Clifford Nongrum toh u khon wachlur ka ri wa ka jylla Meghalaya, uwa da pynyoo yei mynsien wa chlur heipor wa yakhun ha ka thma Kargil ha Batalik Sector ha ka 1 Naiynñiaw, 1999.
Da man u kam u sahep chipai (Army Officer) yong ka 12 Jammu & Kashmir Light Infantry (1997-1999) wei nei chlur mynsien u ha kani ka thma da yoh biang ka India ya ka Point 4812 wa em hapoh ka Batalik Sector.
Ka sorkar India hadien i khlaad yong oo da pynkup warom ko ya oo da ka Mahavir Chakra kawa man kawi na ki khusnam wa khlieh dooh neibynta ki chipai ka ri.
Ynne ka sngi hei kynmo warom ka seiñ da kitbok kitrwiang ko ya kiwa ha yung hasem yong oo deiwa pynman yei ngooh Blai.
Ka seiñ da kyrmen ko leh wa ki khon khynroo ka ri leh daw yoh mynsien ki wei wow bood ki ya ki nongmuna uni u sahep wow yakhun neibynta ka ri.
