U montri rangbah ka jylla u Conrad K Sangma ynne ka sngi da pynbna u wa ki wakreh sorkar Meghalaya kiwa da chah khatæ tulop neibynta u bnai April 2020, u su noh ya iwa chah khate wei ya kani ka poisa da su lang kam chibynta ka tulop u June 2020.
Yaka tulop da khate ka sorkar deiwa pyrkhat boi ya duna ka poisa wa yoh naka sorkar pyrdi wei kamjooh i ye pynmih poisa ka sorkar jylla.
Kam wow pynkynmoo wa neiliang ka Meghalaya State Government Employees Federation (MSGEF) kawa man ka satri ki wakreh sorkar da yachem ki ya u montri rangbah ka jylla wow kyntu u pyndam ya ka rai wow khate ya ka tulop yong ki neibhah wa boon toh kiwa chem chitom ha ka liang ka poisa poilaiñ.
Ha u bnai April ka sorkar da pynbna ko wa neidaw ka khlaam COVID-19 da chim yaka rai wow khate tulop nadooh u montri rangbah, ki montri sorkar, ki IAS kiwa da chah khate 50%, heiwa da khate 35% yaki Group A wa B Officer katwa da khate 25% yong ki wakreh Group C.
Katwa ya ki wakreh ka chnat i chait i khiah, ki pulit waki Civil Defence wa Home Guard ym em chah khate ki.
