Jowai: Ha kani ka sngi wa ar ka 15 tarik Naikhynde, ka Khasi Department iong ka Thomas Jones Synod College da pynman ki ya yaklam pharia ha jrong ka phang ‘Ka shongkha shongman ha ka Jaitbynriew khasi’ kawa da phiah iaka ha ki le bynta 1) Ka shongkha khynnah 2) Ka shongkha khleh 3) Ka chyieñkrung.
Ya kani ka ya phyllu jingmut da pyllai da ka kong R. M. Khonglah Head of Department Khasi. Kiwa ya embynta ha i ya batai toh u Rev. K. Dkhar, u bah P. R. Shabong, Dr. N Nongpluh wa ki khynnah skur wa chah khut u wan ap wan sniaw ya kani ka yaklam toh na ka Kiang Nangbah Government College, na ka Ummulong Presbyterian College, naka Jowai Presbyterian Higher Secondary School na Thadlaboh Presbyterian Higher Secondary School wa ki khynnah pure ka Thomas Jones College.
Kini ki nongklam da pynche ki chaphang ki jingeh wa mih na i ioh kurim dang khian rta næ dang khynnah deiwa ong lada ioh kurim heirta wa dang khian ktah ko yei cheit i khiah, i pyrkhat pyrdaiñ teiñ teiñ poi u pood hadooh wow pyniap iaki khon hapoh kpoh nei daw da sngawthooh ym pu ye u pyndap pynbiang yei jingemkaam i khon. Boonsien katwa dang man khynnah dang khian i rta i baam wa baam ka bei dang toh u khynrong yei doh i pran iong ka kamtæ duna i ioh bam i khonboo hei por dang pun ini pynman ko bunsien mynda kha i khonboo man i iwym biang bam wei ym miat leh i cheit i khiah.
Hei iatoh wei chongkha khleh da ong ki wa hadooh kini ki sngi kat kiwa da chongkha khleh chem wa ym em wanrah myntoi ko haka imlang sahlang, ong ki nongklam neibhah wa utai u chynrang mynda wan chongkha u ia ka khynthai wan chong u du neibhah ka khaii ka pateiñ katwa ia u chabi poisa næ isap i tap ksoh u ha Oo hi. Khamtam i chongkha khleh joor bha i cha i thaw wa em u mooiong wa ki chynrang chongkha ki yow biang i kamai kajih ki kurim iong ki em hi cha ki thaw ki, mynda sniaw ki wa da dap da biang yut ki pui dep te wanrah ko i ri khonrei ha ka jaitbru khasi, rap miat hi u iathooh pra i rap jan rap suk i iaklam ia khana.
Iaka chyieñkrung won da ia batai ki dei wa ong, ha chwa wow chongkha næ chimti ia i da hi kam kitæ ki manbei ne manpa, iwa kongsan toh u sniawthooh chwa kayi ka ka chyieñkrung khnang yow lait i sniawthooh bakla hadien. Ong ki ka chyieñgkrung ymtoh katæ kawa mar iachem næ iachong kurim wa uwon uwon ne kawon kawon ka bru da man ka chyieñkrung han lada hadien dup u iachong khlad. Ka chyieñkrung mut ko i ia sniawthooh jingmut hapyrdi arliang, wei wow iachong iasah chirup chirta.
Kini ki bru chemphang da e ki leh i kyntu kynpham ia kini ki khynnah puræ kiwa man ka lawei iong ka mynried mynkawi dei wow yut jngai ki nei kwah brai iong i jinglong khynroo khyllood neibhah i jingwym poi pyrkhat u bakla hei jingim la dym ye u yait wanrah ko i silet chirta jingim, kamjooh ong ki i pyniap iaki khon hapoh kpoh ym em iaphær ki na u nongpyniap bru uwa chong hapoh patok.
Da kyntu haroh ki, wa hachwa u chongkha chongman toh u khyruiñ u bichar bniah chwa ia-i da hi dei wa kylli ia samen samen, wa nga da biang mo i rta O wow chimti yei man waheh kam katæ ka manbei næ u manpa neibhah ka chongkha chongman toh ka kaam wa kyntang tam ymtoh ka kaam kyndeh hei jingim bru. Chooh chooh toh u lai ha ka luti wa toh wei u sniawthooh yei bor.
Hadien ka iaklam da em won sa ka bynta ia kylli jingmut wa da pachat da ki khynnah puræ ki nongsikai waphær waphær neiliang kini ki bru chemphang leh da ia e jingmut ki katkam i jingkylli wada kylli ki.
Discussion about this post