Shillong: Ynne ka sngi ka Jaiñtia Hills Autonomous District Council (JHADC) hapoh i yahkhmat u CEM, u Thombor Shiwat da lai yachem ki ya u Lat ka jylla, u Tatagatha Roy haiwa da ekti ya oo ya ka dorkhat heiyatoh wa ki kaam ka Council.
Ka Counil da ong ko wa iwi na ki daw wa da ktah ya ka yarong poisa yong ka toh hadien wa khang ka NGT wow tih wei wow chalan ya u mooyong nadooh u 2014 kamjooh leh ka hukum na ka NGT wow khang yei tih moo tih chyiap kamjooh leh u moochuni wa kiwi ki mar pohkhyndaw neibhah wa ka Council yoh poisa ko lynga ka dan na kini ki mar.
Da kdaw ko leh wa katkam ka Rule (6) yong ka Meghalaya Minor Minerals Concession (Third Amendment) Rules 2016 iwa da pyntlot bor ya ka Council neibhah ya ka NOC wa ye u e da ka Council toh du neibynta i pynemkaam ya i thaw katwa kamtæ da kyntu ya u Lat wow phah pynkylla ya ki bynta kani ka aiñ heiwa ymtoh u krehkaam ko hapoh u pood ka Council.
Chooh chooh da ong ko wa ka Council chaniah bha ko ha ka bhah na ka dan (Royalty) na ki marpohkhyndaw Major Minerals kam u mooyong wow pynlaibait ya i krehkaam ka Council wei na kini ki daw ka Council ymye de ko wow su ya ka tulop nadooh u Khonchonglad (November) 2019 iwa da pynbor ya ki wakreh wow yakhih ki.
Heiyatoh wa i chalan tooh ya ki mar pohkhyndaw, ka Council da kyntu ko ya u Lat wow chah ya ka wow ebor wow sylli ko ya ki mar ha ki Weighbridge chwa wow chalan ya ki cha baar u pood yong ka.
Heijooh i por ka Council da ong ko wa katkam wa man katni ka bhah wa yoh ko naka sorkar lyngba ki dan man i du 25% donhi heiwa ka sorkar won da yoh ko 75%, katwa kamtæ da kyntu ya u Lat wow pynku noh ya ka bhah ka Council naka 25% cha ka 50% khnang wow ye u pynlai bait ya ki kaam ka Council.
Da kyntu ko leh ya u Lat wow phah ya ka sorkar wow e yukheiñ ko man u bnai wei wow e ya ka bhah yong ka man ka le bnai.
Ha kani ka sngi da synraan ya u CEM da ki ar ngut ki EM wa kynthup ya u Lasky Rymbai wa u Winning G Sungoh.
