Jowai: Hadien wa mih ka khubor wa ong wa ki kattu katni tylli ki chnong wa kynthup ya ka Huroi, Hingarai waka Lahaleiñ kiwa em ha khappood da angnood ki wow psiah noh cha ka ri Bangladesh neidaw wa chah ieh khonswet ki, ynne ki bor district ka East Jaiñtia da khut yalang ki ya kiwa mihkhmat na kini ki chnong.
Ha kani ka yalang hajrong kiwa mihkhnat na ki le chnong da em leh u Kynjaimon Amse uwa man uwa ektien namo u Spokesperson kini ki chnong wa u Deputy Commissioner wa kamjooh leh u Superintendent of Police ka District.
Ha kani ka yalang neiliang u Kynjaimon da ong u wa da poi hadooh uni u pood toh neidaw wa chah iehbeiñ ware kini ki chnong ha ka sorkar nadooh ki sarok ki luti syngkieñ, i duna ha i sumaar ha i liang i chait i khiah wa kiwi kiwi.
Kiwa mihkhmat na kini ki chnong da ong ki wa da leh yeini yow yoh yei kyrchaan wei wyrai wei kwah donhi ki du wow wanrah ya ki kaam pynroi ha kini ki chnong.
Hadien kani ka yalang neiliang u Deputy Commissioner wa kamjooh leh u Superintendent of Police ka District da rai ki wa ha ki sngi wow wan daw lai ki cha kini ki chnong wow pynsakhiat yeini wei wow leh yeiwa emkaam hajrong iwa chem ki.
